لاء کالج تربت نا اسٹوڈنٹ آک اینو تینا سنگت اسٹوڈنٹ جیئند لیاقت نا زور بیگواہی نا برخلاف تینا برانز ئے رکارڈ کرفیر۔
اسٹوڈنٹ آک ریلی ٹی بھلو کچ ئسیٹ اوار مسُر، ہرافتا دو تیٹ پلے کارڈ و بینر اسُر ہرافتا زیہا جیئند بلوچ و ایلو زوراکی ئٹ بیگواہ کننگوک اسٹوڈنٹ آتا آجوئی نا خواست آک نوشتہ کننگاسُر۔
برانزی تا پاننگ اسک کہ جیئند لیاقت ئے 25 اگست 2025 آ ننکان کیچ ئٹ اونا اُراغان پاکستانی لشکر دزگیر کننگ آن گڈ زوراکی ئٹ بیگواہ کرے، ہراکان گڈ دائسکان اونا ہچ ڈس اف۔
او پاریر کہ خواننگ و چائند ہر ورنا نا بنداوی حق ءِ ولے خوانوکا ورنا تے دا وڑ زوراکی ئٹ بیگواہ کننگ آن خواننگ جہہ تیٹ بیم و خُلیس ودی مننگ ءِ۔
تربت لاء کالج نا اسٹوڈنٹ آک پڑو کریر کہ اگہ جیئند لیاقت ئے دمدستی آجو کننگ متو تو نن تینا برانز ئے شابیت ایتون۔
