بلوچ راجی آجوئی سنگر ( براس) نا ترجمان میڈیا ٹی شنگ کروک تینا درشان ئسیٹ پارینے کہ مستونگ و زامران ئٹی کوزہ گیر پاکستانی لشکر تون اوار جتاء جلہو تیٹ کوزہ گیر لشکر نا 7 کارندہ مرگ ئنا گواچی مسر، جھڑپ آتیٹ بلوچ راجی آجوئی سنگر نا چھار سرمچار شہید مسُر۔
او پارے کہ مستونگ نا علاقہ دشت ئٹ 12 ستمبر 2025 آ کوزہ گیر پاکستانی لشکر نا ڈرون جلہو آن پد ہیلی کاپٹر تا زریعت ئٹ کمانڈو دھڑفسہ مُستی گھام خلنگ نا کوشش کریر۔ ہموتم کوزہ گیر لشکر و سرمچار تا نیامٹ جھڑپ بناء مسک۔ کوزہ گیر لشکر ئے مونی بننگ آن تورسہ سرمچارک کوزہ گیر لشکر نا 3 کارندہ مرگ ئنا گواچی کریر، 2 سرمچار ابوبکر عرف مجید و عبدالحد عرف عثمان شہادت نا عظیم آ جہہ ئے دوئی کریر۔
او پارے کہ زامران نا علاقہ کوتان ئٹی 13 ستمبر 2025 آ بلوچ راجی آجوئی سنگر نا سرمچارک و کوزہ گیر پاکستانی لشکر نا نیامٹ جھڑپ تا بناء مسک ہراتم سرمچارک گشت آ اسر۔ دا جھڑپ آتیٹ کوزہ گیر لشکر نا چھار کارندہ کھسکر و کہیک ٹپی مسر، 2 سرمچار سدیر عرف برمش و اسلام عرف سگار شہید مسر۔
ترجمان پارے کہ شہید سنگت ابوبکر کرد عرف مجید ولد فتح محمد مستونگ نا علاقہ دشت آن تعلقداری تخاکہ۔ او سال ئسے آن بلوچستان لبریشن فرنٹ تون اوار اس و مستونگ و کوئٹہ نا محاز آتیا کاریم کریسس۔
شہید سنگت عبدالحد مینگل عرف عثمان ولد حاجی موسی نا تعلقداری قلات نا علاقہ جوہان آن اسک۔ او سال ئسے آن بلوچ لبریشن آرمی تون اوار اسک و مستونگ نا محاذ آتیا کاریم کریسس۔
او پارے کہ شہید سنگت اسلام عرف سگار ولد عطا محمد نا تعلقداری مشکے نا علاقہ تنک آن اسک۔ لوامز یونیورسٹی اوتھل آن خوانوکا ورنا اسلام عرف سگار اینخو بلوچ لبریشن آرمی تون اوار مسس و پنجگور نا محاذ آ کاریم کننگ اسک۔
ترجمان پارے کہ شہید سنگت سدیر بلوچ عرف برمش ولد پیر جان تمپ نا علاقہ سری کہن نا جہی ئس اسک اونا بنداوی تعلقداری زامران آن اسک۔ او خدو نومبر ئٹ بلوچستان لبریشن فرنٹ تون اوار مس و زامران، مند و تمہ نا محاذ آتیا کاریم کرے۔
درشان نا ایسر ئٹ ترجمان پارے کہ ننا شہید سرمچارک تینا ساہ تے گوئندسہ دا پھاش کرینو کہ غلامی ئے مننگ نا ہچو کسر ئس اف۔ دا گوئندینگ آک ننے دا احساس ایتیرہ کہ ننا ہر گام بروکا نسل ئنا بروکاتم تون تفوک ءِ۔ اندا عزم تون اوار نن تینا جہد ئے برجاء تخون تانکہ بلوچستان اسہ آجو ءُ سرزمین ئسے نا وڑ ئٹ تینا ٹیوار ئے جوڑ کتنے۔
