بلوچستان لبریشن فرنٹ (بی ایل ایف) نا میڈیا سیل ” آشوب ” نا کنڈ آن پاکستانی لشکر آ کننگوک کیہی جلہو تا ویڈیو فوٹیج شنگ کننگانے، ہرافتیٹ پاکستانی لشکر و اونا ماڑی تیا جلہوک خننگ مریرہ۔
شنگ کروکا ویڈیو ٹی کل آن اول مشکے ٹی اسہ لشکری ویگو ئسے ٹک کننگ نا ندارہ نشان تننگانے، ہراڑے اسہ کارندہ ئسے تھرمل نا زریعت ئٹ ٹک کرسا مرگ ئنا گواچی کننگِک۔
اسہ پین وڈیو ئسیٹ آواران ٹی لشکری ہیڈ کوارٹر آ مارٹر گولہ خسنگ آ خننگ مریک، ہرا ہیڈ کوارٹر نا تہٹی تمِک۔
پین ویڈیو ئسیٹ مشکے ٹی پاکستانی لشکر کن راشن دروکا گاڑی تے تورسہ اوفتِہ خاخر تننگک۔ ضلع کیچ ئنا علاقہ تجابان ئٹی بلوچستان آن پنجاب آ معدنیات دروکو چھار ٹریلر گاڑی تے ہم خاخر تننگک، ہراڑان چھار انگا گاڑیک ہُشنگرہ۔ سرمچارک ہرے اسکان سی پیک کسر آ گشت کیرہ۔
داکان بیدس گوادر و خاران ئٹی حال حوالی ٹاور تے خاخر ترسا بُن تننگک۔ خاران نا اسہ جوڑشتی کمپنی ئسے آ جلہو ئٹ چھار گاڑی ہشنگ مریک۔
ویڈیو نا اسہ پین بشخ ئسیٹ کولواہ ٹی اِرا لشکری کارندہ تے آئی ای ڈی جلہو ئٹی ٹک کرسا خننگ مریک تومکا لشکری کارندہ غاک خلنگ مریرہ، ایسر ئٹ مسہ کارندہ تیا جلہو کننگ مریک، ہرافتیان اسٹ ئس مرگ ئنا گواچی مریک، و ایلو تومکاک نریرہ۔
بلوچ سلاہ بند تنظیم نا کنڈ آن شنگ مروک ویڈیو تیٹ پاکستانی لشکر آ کروک جلہو تا ندارہ غاک اوار ءُ، ہرافتا بابت ئٹ پاکستانی لشکر نا کنڈ آن ہچ وڑ ئنا پک کروک بیان مونا بتنے، واہم بی ایل ایف نا شنگ کروک وڈیو پاکستانی لشکر نا چُپی ئے بے پڑدہ کرسا راستی تِہ مونا ہیسُنے۔
