قلات نا علاقہ شیخڑی، گندہ گین آن خننگوک تومکا جون تا چاہنداری محمد حنیف نا مار سمیع اللہ و غلام سرور نا مار بسم اللہ نا پن ئٹ مسنے، ہرافتِہ ہنوکا ہفتہ ٹی مستونگ آن پاکستانی لشکر زوراکی ئٹ بیگواہ کریسس۔
لیویز آن رسینگوک حوال تا رد ئٹ تومکا بندغ آتے سمکاری کرسا کھسفنگانے، و جون تِہ آر ایچ سی منگچر آ رادہ کننگانے ہراڑے قانودی کارروائی برجاء ءِ۔
ہڑتوما بندغ آتا تعلقداری ضلع مستونگ نا علاقہ پڑنگ آباد آن اس۔ خاہوت آک پک کرینو کہ سمیع اللہ و بسم اللہ ئے 29 مئی آ ایف سی کارندہ غاک زوراکی ئٹ بیگواہ کریسُر۔
خیال ئٹ مرے اینو پاکستانی فوج ئنا ترجمان آئی ایس پی آر قلات ئٹ اِرا بلوچ آجوئی دوست خلنگ نا دعوی کریسس ہراکان گڈ دا ہڑتوما بندغ آتا جونک خننگار۔
دا تومکا جون تا خننگ آن دا ہیت ئنا گمان سوگو مریک کہ ہڑتوما ورنا تے دزگیر کننگ آن گڈ پاکستانی لشکر اوفتِہ دزگیری ٹی کھسفینے و دروغ ئنا مونتس نا پن تسنے۔
