نبشتہ: سوبین بلوچ
براہوئی مٹ: ماہین بلوچ
زرمبش براہوئی
سنگت آک ہمو جاگہ نا پاریسُر نن تینے ہموڑے سر کرین۔ زرہ ئسے آن پد رؤف جان و ایلو سنگت آک بسُر، ولے رؤف جان ئے پوسکنو جھاٹہ ئس بڈ آ اسک۔ خیر سنگت آتا بلوچی حال حوال آن پد دیوان و ہیت بناء مس، مچٹ وخت گدرینگ آن پد سنگت آک فیصلہ کریر کہ شام ئنا انداڑے اڈ کینہ و سہب ئنا پیشتمِنہ۔ ای رؤف جان نا پارہ غا اشارہ کریٹ و پاریٹ کہ نیتو پوسکنو جھاٹہ ئس ءِ، نا کُل مڈیک ہم بریبر ءُ، نی جند ندری کن تون ہِننگ افیس؟ گڑا او تینا مون ئے کنا پارہ غا ہڑسا و پارے، ” نہ اڑے دُن اف، ولے دا جہد ئنا ہر سنگت جند ندر ئس ءِ۔“ اندا ہیت ئے کننگ آن گُڈ او بش مس و چاہ دانی ئے دوٹی کرسا پارے ”چاہ ئس کیو۔“ رؤف جان ہر کاریم ئے تینٹ کریکہ، اسہ دے ہم ای بِنتوٹ کہ او کس ئے پارے بشہ دا کاریم ئے کر۔ اندا سوب آن وتاخ نا کُل سنگت آک رؤف جان آن اُست ئٹ بھاز خوش اسُر۔ اوڑے کُھریا ئس ہم پھیری کننگ اس تو سنگت آک اوڑان ہیٹ ئس ہلکُر تھڑیر۔ اِرغ کُننگ آن پد ہرکس ہرکس مس و خاچنگ جہہ تیا ہنار، ای و رؤف جان ہم تینا خاچنگ جہہ آ ہنان۔
ننا خُڑک آ رؤف جان تینا خاچنگ جہہ آ توس و بھاز ہُرے اسکان ٹَک خلنگ اس، اسیکہ کتاب ئس خواناکہ و اسیکہ تینا خیال و ٹَک آتیٹ اختہ مسکہ۔ ای توار کریٹ و پاریٹ، ”داسا خاچ کریس غزا تے“ بلے رؤف جان بے توار اس۔ سہب ئنا وختی و کم کم روشنائی مننگ اس، خنیوہ ننا رہان پادرونشک آتا توار مس، خنیوہ کہ رؤف جان ئے منَہ پاٹ بڈ آٹے و گدرینگءِ۔ انداڑے چاہ دان ئے دوٹی کرے و توار کرے بشَبو لشکر۔ نن جھٹ ئس جان بڈی کرین تانکہ چاہ تیار مس، چاہ کہ تیار مس نن داسا بش مسون۔
ورغ آن پد نن تینا بڈ آتِہ تفین و رادہ مسُن، ای و رؤف جان بیش تِہ کُرررو کرسا روان اسُن ایلو کُل سنگت آک رند ئٹ بننگ اسُر۔ دا بھلا کسر آ ای اِرا مُسہ جاگہ غا دم کشنگ کن توسُٹ، ولے رؤف جان اسہ وڑ گھام خلنگ اس و دمدرینگ نا پن ئے ہلنگ الو۔ خیر وخت بھاز تدینگا نن ہنان اِرا مُسہ شَم ئٹ جھل ئٹ اڈ کرین۔
سنگت آک بشخ مسُر کہ دیر نا پوزیشن اراڑے کن ءِ، کاریم تا وڑ و ڈول ئے جوڑ کریر کہ نوشکی نا پارہ غا کاریم ئس کروئی ءِ۔ رؤف فرنٹ لائن آ جنگ ئنا ارٹمیکو کمان اس، گُڑا ہر سنگت تینا وڑ آ سر سوج کرے و پدا دیوان ایسر مس۔
گڑاس سنگت ہنار دیر ئنا پارہ غا، گڑاس پین کاریم تیٹ اختہ مسُر۔ ای توسُٹ کہ اِرغ ئس کیوہ گڑا رؤف جان بس و پارے، "نی بش مر ای اِرغ کیوہ۔” ای پاریٹ، "توڷ کنا رہا اِرغ ای تینٹ کیوہ نی ہیت کر علی جان ثاقب نا جوانو شئیر خڷ زند ئنا باور اف جنگ ئنا مونا دیر چائک انت مریک۔” رؤپ جان ہنینو بشخندہ ئسیٹ پارے جنگ ئنا چاننگ مفک، ولے دا دشمن لغور ئس ءِ و جنگ کننگ کپک۔
اندا ہیت ئتون کنا خف تیٹ توار ئس تما، اندن کس پارو کہ خف تیٹ ڈرون ءُ ہیلی کاپٹر نا توار ءِ۔ ای پاریٹ رؤف جان توار ئس اف؟ کنے پائک کہ ” داڑے توار بریک روڈ ءِ، ہیمون آ نوشکی ءِ۔ اے روشنائی نوشکی نا ءِ۔“
رؤپ جان زند ئنا بھاز جہہ آ، کسر و راہبند آ ساندہ کنے پُہہ کرینے۔ گڑا نن اِرغ کُنگُن و سہب ئنا پدا پیشتمان۔ ای و پین سنگت ئس بیش تِہ بھاز ترندی ئٹ دننگ اُسن، گڑا رؤف جان پد آن توار کرے، "مچٹ کرار کرار ہنبو ارا پاکستان دودیفنگ ئٹی ءِ نمے۔سہدارک عزاب مریرہ۔” تینٹ ننتو اوار مس و بھاز ہیت کرے، نن بیرہ اونا ہیت آتِہ بِننگ اسُن و ہِننگ اسُن۔ خیر نن پاچنان نا بھلا جھل آن خُڑک مسُن، تینا ایلو مڈی تِہ ڈھکان و کنوئی آ مڈی تِہ بڈ کرین و شام تمنگ نا انتظار ئٹی اسُن۔
برجاء ءِ۔۔۔
