پاکستانی لشکر نا دو آن زوراکی ئٹ بیگواہ کننگوک ماہ جبین بلوچ و محمد یونس بلوچ دائسکان بیگواہ ءُ، خاہوت پگہ واشک ئٹ برانز اڈ تننگ نا پڑو کرینے۔
تومکا ایڑ ایلم ئے پاکستانی لشکر شال (کوئٹہ) آن دزگیر کننگ آن گڈ بیگواہ کریسس، ہرافتا دائسکان ہچ ڈس اف۔
اوفتا ایڑ رقیہ بلوچ نا پاننگ ءِ کہ ماہ جبین و محمد یونس دائسکان بیگواہ ءُ و ننے اوفتا بارو ئٹ ہچ وڑ ئنا حوال تننگ متنے۔
او پڑو کرینے کہ پگہ سہب ئنا 11 بجہ غا واشک نا علاقہ بیسیمہ ٹی ماہ جبین بلوچ و محمد یونس بلوچ نا آجوئی کن اسہ برانزی ریلی ئس کشنگ مرو۔ او بلوچ الس آن خواست کرینے کہ او دا برانز ئٹ اوار مریر۔
خیال ئٹ مرے 29 مئی آ پاکستانی لشکر (ایف سی) و ڈھکوک ایجنسی تا کارندہ غاک سول اسپتال شال آن بلوچستان نا ہند بسیمہ نا جہی ماہ جبین بلوچ ئے دزگیر کرسا تینتو دریسُر، ہرا داسکان پاش کننگ متنے۔
ماہ جبین نا خاہوت تدینی نا رد ئٹ شال پریس کلب ئٹی پریس کانفرنس ہم کریسس و پارسس کہ ننا نیاڑی شال ئٹی خواننگ کن رہینگاکہ، 21 مئی آ ماہ جبین نا ایلم محمد یونس ئے پاکستانی لشکر اونا اُرا غا چھاپہ خلسہ تینتو اوار درے، ہراڑان پد او بیگواہ ءِ۔
خاہوت پارے کہ تومکا ایڑ ایلم ئے دزگیر کننگ نا وخت آ انتظامیہ نا کنڈ آن ہچو ایف آئی آر و قانودی دستاویز نشان تننگ متو، ماہ جبین و اونا ایلم داسکان پاش کننگ متنو۔
