ناروے نا شار للے ہامر ٹی برجاء جہانی تیبر نا بندغی حق آتا کانفرنس ورلڈ ایکسپریشن فورم (WEXFO) ٹی بلوچ یکجہتی کمیٹی نا راہشون ڈاکٹر ماہرنگ بلوچ نا وے ساڑی مننگ ئے بھاز شرف ئٹ یات کننگا۔
کانفرنس نا اڈ تروکا اونا علامتی نمائندگی ئے کرسا اونا تولنگ جہہ ئے خالی اِلار، ہرا بندغ آتیکن اسہ زہم تخوکو کلہو ئس ءِ۔
کانفرنس نا اڈ تروکا ہموتم پڑو کریر کہ ڈاکٹر ماہرنگ بلوچ اینو بندغی حق آتیکن توار بڑز کننگ نا سوب آن بندی ءِ، اندا برانز نا رد ئٹ نن اونا کرسی ئے خالی اِلانن۔
دا علامتی گام درشانی نا آجوئی (آزادی اظہار رائے) و بندغی حق آتا رکھ کن توار بڑز کروکا باسک آتیتون اواری نا درشانی کن ہرفنگا۔
کانفرنس ٹی بندغ حق آتا وکیل ایمان مزاری، صحافی کیا بلوچ و کیہی جہانی بندغی حق آتا باسک و ورنا راہشونک اوار مسر۔
ہموتم بندغی حق آتا کارکن و وکیل ایمان مزاری خالی کرسی نا عکس ئے پوسٹ کرسا لکھا کہ ڈاکٹر ماہرنگ بلوچ ئے داڑے للے ہامر ٹی بندغی حق آتا کانفرنس نا وخت آ یات کننگانے۔
صحافی کیا بلوچ پارے کہ نوبل داد دوئی کروک ماریا ریسا، ہرا ریپلر نا شریک بانی ءِ، ہراتم پُر انگا حال ئٹ تران کننگ اسک، اسہ خالی کرسی ئس چُپی ئٹ ڈاکٹر ماہرنگ بلوچ ئے دروت ندر کننگ اسک۔ دا ہمو بندغ آتا یات کننگ ءِ ہرا راست پاننگ نا سوب آن چُپ کرفنگیرہ۔
ڈاکٹر ماہرنگ بلوچ نا ایڑ، ہرا اونا کیس ئے خڑک آن ہُننگ ءِ، پارے کہ WEXFO نا بھاز منتوار اُن کہ او ڈاکٹر ماہرنگ بلوچ ئے اینو بیرہ اسہ پن ئنا وڑ ئٹ نہ بلکن اسہ جیرت و ضمیر نا چیدہ نا وڑ ئٹ یات تخا۔
ماہرنگ بلوچ نا ایڑ نادیہ بلوچ پارے کہ خَدو ماہرنگ اندا اسٹیج آ سلوک دلیری ئٹ تینا راست انگا ہیت آتِہ کننگ اس، اینو او اندا راست پاننگ نا سوب آن بندی ءِ۔ اونا اسٹ انگا ڈوہ دا اسک کہ او بے انصافی آ چپ مننگ آن نمن مسکہ۔ ہمر نن ارٹمیکو ائید ئے اوڑان بیدس گدریفنگ اُن، اونا وے ساڑی مننگ اسہ اندونو ٹپ ئس ءِ ہرا دائسکان دُراخ متنے۔
نادیہ بلوچ پارے کہ او خالی کرسی بیرہ اونا کمی نا اشارہ الیتوکہ بلکن ہمو تاغت آتا یاد دہانی اسک ہرا اختلاف رائے ئے چپ کرفنگ خواہیرہ، ولے دا ہم یاد ایترہ کہ چپی ٹی ہم مزاحمت زندہ ءِ۔
