بلوچستان نا علاقہ جیونی آن پاکستانی لشکر اِرا ورنا دزگیر کرسہ زوراکی ئٹ بیگواہ کرے۔ اندُن راڑہ شم و تُربَت آن مُسہ زوراکی ئٹ بیگواہ کننگ مروک ورنا آزات مرسہ تینا اُراتے سر مَسُر۔
ضلع گْوادر نا تحصیل جیونی آن رسینگوک حوال تا رد ئٹ استو ننکان کُلدان خلک ئٹی پاکستانی لشکر اُراتا چھاپہ خلسہ کاروائی نا وخت آ اِرا ورنا دزگیر کرسہ درے ہرافتا دائسکان ہچ ڈس اف کہ ارانگ و امر ءُ۔
زوراکی ئٹ بیگواہ کننگ مروک ورناک لال محمد نا مار مراد جان و پتیان نا مار راشد نا پن ئٹ درست مسنو۔
اندُن راڑہ شم نا ہند آ اِرا تو مُست زوراکی ئٹ بیگواہ کننگ مروک اِرا ورنا آزات مسُر اڑتومکاک بزدار قبیلہ نا ءُ۔
اندُن پاننگک کہ خان محمد مینگھاڑی بزدار نا مار ظفر و ایوب نمڑدیغ بزدار نا مار آفاق ءِ سی ٹی ڈی و ایف سی شش اپریل آ زوراکی ئٹ بیگواہ کریسُر۔
ایلو کنڈ آن ضلع کیچ ئنا ہند ناصر آباد نا جہی ورنا محمد حسن نا مار انضمام حسن ئے پاکستانی لشکر زوراکی ئٹ بیگواہ کریسس ہرا آجو مسنے۔ ائید آن مُست انضمام حسن نا آجو مننگ آن خاہوت بھاز خوش ءِ۔
