بلوچ لبریشن آرمی نا ترجمان جیئند بلوچ میڈیا ٹی شنگ کروک تینا درشان ئٹ پارینے کہ بلوچ لبریشن آرمی نا سرمچارک مستونگ ئٹی لیویز فورس نا تھانہ و چوکی تا کنٹرول ئے دوئی کننگ تون اوار کوزہ گیر لشکر آ جلہو کریر۔ کوئٹہ ٹی کوزہ گیر لشکر نا اسہ کمکار ئسے آ ہم جلہو کننگا۔
او پارے کہ بی ایل اے نا سرمچارک درو شام مستونگ ئٹی ولی خان پولیس تھانہ ئے تینا کنٹرول ئٹ کریر، سرمچار تا اسہ ٹولی ئس کوئٹہـ کراچی بنجائی کسر آ ساڑی لیویز چیک پوسٹ آ کوزہ کرسا کسر ئے تفیر ہرا اسہ ساہت ئسے اسکان برجاء سلیس۔
اونا پاننگ اس کہ سرمچارک دا کاروائی ٹی تھانہ و فورس نا گاڑی تِہ ہشِسہ بھس کریر، فوجی کارندہ تا شش سلاہ دوئی کریر۔ سرمچارک دزگیر کروک لیویز کارندہ تے اوفتا بلوچ چاہنداری نا بنیات آ مشروط رعایت ترِسہ پدا آجو کریر۔
ترجمان ودیک پارے کہ بلوچ لبریشن آرمی نا سرمچارک یک شمبے نا شام مستونگ نا علاقہ کھڈ کوچہ ٹی کوزہ گیر پاکستانی لشکر نا اسہ پوسٹ ئسے جلہو ٹی ٹک کریر۔ دا جلہو بیست منٹ آن زیات برجاء مس، ہراٹی سرمچارک خودکار و کبین آ سلاہ تیٹ جلہو کریر، ہرانا سوب آن دژمن لشکر نا ارا کارندہ ہموتم مرگ ئنا گواچی مسر، دژمن ئے پین ہم جانی و مالی نسخان تون مون تروئی تما۔
او پارے کہ بی ایل اے نا سرمچارک 27 مئی آ کوئٹہ نا جی ڈی اے گراؤنڈ نا جاگہ غا کوزہ گیر پاکستانی لشکر نا آلہ کار محمد نبی خلجی ئے سلاہ بند جلہو ئٹی ٹک کریر، ہراٹی او بھاز ٹپی مس۔ ہندا آلہ کار تحریک جوانان پاکستان، مارخور ونگ کوئٹہ نا صدر ءِ۔ ہرا کوزہ گیر پاکستانی لشکر نا پیرول آ بیرہ پن ئنا (نام نہاد) جشن و ریلی اڈ ایتک۔ آلہ کار محمد نبی بندغ آتے لالچ و دڑکو ترسہ کوزہ گیر پاکستانی لشکر کن بھرتی کننگ ئٹی اوار مسنے۔
جارکش ایسر ئٹ پارے کہ نن پھاش کینہ کہ کل کوزہ گیر پاکستانی لشکر نا پیرول آ ریلی و جشن اڈ تروکا ریاستی کمکارک ننا نشانہ غا مرور، الس آن خواست کینہ کے او دننگا بندغ آ تیان مُر مریر تانکہ ہچ وڑ ئنا جانی و مالی نسخان آن رکھوک مریر۔
