نیدر لینڈ نا شار دی ہیگ ئٹی بلوچ نیشنل موومنٹ نا پارہ غان، 28 مئی 1998 آ بلوچستان نا علاقہ چاغی ٹی کننگوک ایٹمی تراک آتا برخلاف اسہ برانزی ریلی ئس کشنگا و پاکستانی سفارتخانہ نا مونا برانز کننگا۔
برانز کروکا تا دو تیٹی پلے کارڈ اسک و اوفک بینر ہرفیسُر، ہرافتا بلوچستان ئٹی ایٹمی چکاس، زوراکی ئٹ کوزہ و بندغی حق آتا لتاڑ نا برخلاف نعرہ نوشتہ کروک اسک۔ اوار مروک آک چاغی ٹی کننگوک ایٹمی تراک، بلوچستان نا زوراکی ئٹ اوار کننگ و آجوئی نا جنر ئنا حق ئٹی نعرہ خلکُر۔
برانز ئٹ بی این ایم نیدر لینڈ چیپٹر نا صدر عبدالرحیم، ڈاکٹر لطیف بلوچ، واحد بلوچ، عصا بجار، زہرہ بلوچ و پشتون تحفظ موومنٹ نا باسک زر خان تران کریر۔
"ہندی آبادی اینو اسکان تابکاری نا زیم آتا گواچی ءِ۔” تران کروک آک پاریر
تران کروک آک پاریر کہ چاغی نا مشی آ علاقہ ٹی کننگوک تراک آتے آن پد ڈغار، دیر و تہو ٹی تابکاری نا کچ بھلو کچ ئسے اسکان ودھانے۔ اوفتا رد ئٹ ہندی آبادی اینو ہم ایٹمی زیم آتے آن زیمی مننگ ئٹی ءِ، ہراڑے سِل ئنا ناجوڑی، دم ئنا تکلیف، نظر نا نزوری و کینسر آن بارنگا ناجوڑی تیٹی بھلو کچ ئسے ئٹ ودُکی خننگ مسنے۔
او پاریر کہ زیمی مروک دیہات نا ہندی تے نہ تو تراک آتان مُست حال تننگا و نئے کہ تراک آتے آن پد اوفتا جانجوڑی کن عملی گام ہرفنگا۔ کیہی خاہوت آک تابکاری نا زیم آتا خُلیس آن علاقہ ئے النگ آ بیوس مسر۔ تران کروک آک دا ہیت آ اوسوز نا درشانی ئے کریر کہ اینو اسکان ہچو جہانی ادارہ یا بندغی حق آتا تنظیم ئس دا تراک آتا آزات سائنسی و غیر جانبدار پٹ ئہ پول کتنے۔
"دنیا پاکستان نا جوہری کاریم تے بیرہ ہُرِسٹ کرے۔” تران کروک آک نغد کاری کریر
تران کروک آک گیشتر پاریر کہ دنیا نا ایلو ڈیہہ تیٹی اگہ ایٹمی تراک کننگا تو اوڑے رکھنگ نا گامگیج ہرفنگا و نج پٹ ئہ پول کننگا، ولے بلوچستان ئٹی نہ بیرہ ایٹمی تراک کننگا بلکن کیہی رپورٹ آتا رد ئٹ پاکستان تینا ایٹمی سلاہ تے ہم بلوچستان ئٹی جاگہی کرینے۔ اگہ ہمرو ہم وخت ئسیٹی تابکاریک پیشتمار تو دانا نسخان کھل آن گیشتر بلوچ الس ئے مرو، ہرا مہالو آن معاشی سیاسی و بندغی بحران نا گواچی ءِ۔
او جہانی ادارہ و بھازیکا اقوام متحدہ و انٹرنیشنل اٹامک انرجی آ نغد کاری کرسہ پاریر کہ او پاکستان نا دا جوہری کاریم تے آ بیرہ بے توار مرسہ ہُرار، نہ کہ اوفتِہ توریر و نہ کہ داسکان پاکستان آن سوج کننگ ءُ۔
