بلوچستان نا علاقہ مستونگ ئٹ پاکستانی لشکر جتا علاقہ تیان مُسہ بندغ نن نیمہ غا بیگواہ کرینے۔
بیگواہ کننگوک بندغ آک کلی کاریز سور نا جہی حاجی غلام فاروق نا مار عاصم فاروق شاہوانی، کھڈکوچہ نا جہی حاجی محمد اشرف نا مار محمد وفا شاہوانی، و کلی کونگھڑ نا جہی حاجی محمد ابراہیم نا مار خلیل احمد شاہوانی نا پن تیٹ درست مسنو۔
پاننگک کہ خلیل احمد شاہوانی ٹی بی نا مریض ئس ءِ و اندا زوت ئٹ تبلیغ آن واپس بسس۔
خاہوت نا پاننگ ءِ کہ مُسٹ انگا بندغ آتے نن نیمہ غا چھاپہ آتا وخت آ پاکستانی لشکر دزگیر کننگ آن گڈ بیگواہ کرینے۔
اندن، 29 مئی آ پاکستانی لشکر (ایف سی) مستونگ آن اِرا ورنا دزگیر کننگ آن پد بیگواہ کرے، ہرا غلام رسول نا مار بسم اللہ و محمد حنیف نا مار سمی اللہ نا پن ئٹ درست مسنو، تومکا تا تعلقداری مستونگ نا علاقہ پڑنگ آباد آن ءِ۔
جہی حوال تروکا تا پاننگ ءِ کہ تومکا ورنا تِہ مستونگ آن منگچر آ ہِننگ نا وختا ایف سی کارندہ غاک دزگیر کریر۔
ضلع پنجگور نا تحصیل پروم ئٹ پاکستانی لشکر نن نیمہ غا کیہی اُرا تیا چھاپہ خلک و 31 مئی نا نن خُڑکیکا 12 بجہ غا پروم نا علاقہ رحیم آباد و نعیم آباد ئٹ چھاپہ خلک ہراڑے پاکستانی لشکر تیبہ علاقہ ئے گھیرہ کرے۔
چھاپہ آتا وخت ورنا شہزاد ولد نذیر ئے دزگیر کننگا و نادرستو جاگہ ئس دننگ مس۔
زیمی مروک خاہوت نا رد ئٹ، رحیم آباد ئٹ شہزاد ئے اُراغان بیگواہ کننگانے۔ شہزاد نا خُڑک ئنا سیال بشیر احمد نا پاننگ ءِ کہ: “کنا الہ مڷ شہزاد ئے رحیم آباد آن بیگواہ کننگا و پدا ننا اُراغا ہم چھاپہ خلنگا۔”
او ودیک پارے کہ منہ دے مُست کنا چُنکا ایلم جنگیان بلوچ ئے ہم زوراکی ئٹ بیگواہ کننگانے ہرا نا دائسکان ہچ ڈس اف۔
ایلو کنڈ آن پاکستانی لشکر و ڈھکوک ایجنسی تا کارندہ غاک درو ننکان ضلع کیچ ئٹ ہم چھاپہ خلِسہ اِرا ورنا بیگواہ کرینو۔ ہرا لال بخش نا مار مراد جان و پتیان نا مار راشد نا پن ئٹ درست مسنو۔ تومکا دشت ئنا علاقہ کلدان نا جہی ءُ۔
اندن بلوچستان نا ضلع کیچ آن پاکستانی لشکر نا دُو آن زوراکی ئٹ بیگواہ کننگوک پنچ بندغ آجو مرسہ تینا اُراتے سر مسُر۔
تُربَت آن حوال ءِ کہ پنچ بیگواہ کننگوک بندغ آجو مسنو ہرافتِہ مُست تربت پولیس تھانہ غا ہتنگ مس اوکان پد خاہوت آتِہ حوال تننگ آن پد بندغ آتِہ اوفتا حوالہ کننگا۔
آجو مروک بندغ آک بلیدہ نا جہی دوست نا مار غلام قادر، آپسر نا جہی محمد حسن نا مار دل مراد آسکانی، آپسر نا جہئ حیدر نا مار زاکر حیدر آسکانی، آپسر نا جہی ملا عبداللہ نا مار زید و بلیدہ نا جہی عبدالغنی نا مار عبدالمجید اوار ءُ۔
