ہفتہ نا دے بلوچستان نا اِرا جتاؤ علاقہ، ڈیرہ مراد جمالی و سوئی ٹی گیس پائپ لائن آتِہ تراک ئٹ ٹِک کننگانے۔
پولیس نا رد ئٹ تومکا تدینی تیٹ ترخوکو مواد کاریم ئٹ ہتنگ مسنے۔
ڈیرہ مراد جمالی نا علاقہ نصیرآباد ئٹ نادرست آ بندغ آک گیس پائپ لائن ئے ترخوکا شورہ تیٹ تباہ کرینو۔
پولیس نا پاننگ ءِ کہ تراک نا وخت آ پائپ لائن ئٹ گیس ئنا سپلائی بند مسنے ہرا نا سوب آن کم نسخان مسنے۔
ایلو تدینی سوئی ٹی کشمور روڈ آ مزاری کوٹ ئنا ہند آ مسنے، ہراڑے گیس پائپ لائن ئے تراک ئٹ تباہ کننگانے۔
پولیس و حساس ادارہ آتا کارندہ غاک دمدستی ہمو جہہ آ سر مسنو۔ ایس ایس پی نا رد ئٹ اولیکو پٹ ئہ پول آن سما تمانے کہ ترخوکو مواد کاریم ئٹ ہتنگ مسنے۔
واہم تومکا تدینی تا ذمہ واری ئے دائسکان ہچو تنظیم ئس ہرفتنے۔
