بی ایل ایف نا ترجمان میجر گہرام بلوچ میڈیا ٹی شنگ کروک تینا درشان ئٹی پارے کہ 31 مئی ہفتہ نا دے یانزدہ بجہ نا وخت آ سرمچارک خضدار نال ئٹی پڑیچ ہوٹل نا خُڑک ریاستی مُخ تفی ٹی کاریم کروک بیرہ پن ئنا (نام نہاد) امن فورس نا اِرا کارندہ مُست سنگر ہلِسہ مرگ ئنا گواچی کریر و سلاہ تے تا ہرفیر۔
ترجمان پارے کہ نال شار ئٹی نیشنل پارٹی نا سروک اسلم بزنجو نا مار شاہ میر بزنجو نا بھلنی ٹی ڈیتھ اسکواڈ نا اسہ ٹولی ئسے بلوچ راجی تحریک نا برخلاف متحرک کننگانے ہرافتِہ بیرہ پن کن امن فورس نا پن تننگانے۔ بی ایل ایف امن فورس و بلوچستان نا ایلو ڈیتھ اسکواڈ نا سرکڑدہ و کارندہ تِہ خبردار کیک کہ اوفک ریاست نا دو آن کارمرز مفس اگہ نہ تو اوفتِہ ہم ٹک کننگ مرو۔
ترجمان مُستی پارے کہ ایلو کاروائی ئے سرمچارک اینو دے ئنا دو بجہ غا خاران شار ئٹی کریر۔ سرمچارک خاران ئٹی شاہوانی چوک آ سنگر ہلِسہ پولیس کارندہ تِہ دزگیر کریر و اوفتا سرکاری سلاہ تِہ ہرفیر اوفتِہ بلوچ مننگ نا سوب آن شرف ئٹ یلہ کریر۔
ترجمان ایسر ئٹ پارے کہ نن دا ارٹنگا جلہو تا زمہ واری ئے ہرفنہ و کُل بندغ آتے خبردار کینہ کہ اوفک کوزہ گیر ریاست نا دو آن کارمرز مفس اگہ نہ تو اوفتا ایسر ہم دشمن لشکر نا وڑ ئٹ مرو۔
