بلوچستان نا جتا علاقہ تیان پاکستانی لشکر نا دو آن 10 بندغ زوراکی ئٹ بیگواہ کننگانو۔
پنجگور نا بازار چتکان ئٹی پاکستانی لشکر موبائل نا دکان ئسے پلویڑ کرِسہ 5 بندغ ئے زورانسری بیگواہ کرینے۔
بیگواہ غا ورنا تیٹی پنجگور نا پنی آ ورنا غا تاجر وہاب ہم اوار ءِ۔ تدینی 28 مئی آ مس، ہراتم پاکستانی لشکر دکان ئسے پلویڑ کرے، دکان نا کُل نہادی آ گِڑا تن ہم تینتو درے، ہرافتا نہاد لکھ آ تیٹ ءِ۔
ایلو کنڈ آن ضلع کیچ ئنا بھلا شار تربت سنگانی سر آن اسہ ورنا ئسے پاکستانی لشکر زورانسری دزگیر کننگ آن گڈ بیگواہ کرے۔ ہراکہ پولیس نا کارندہ ئس ءِ و طاہر نا مار عدنان نا پن ئٹ درست مسُنے۔
جماعت اسلامی بلوچستان نا صوبائی صدر و صوبائی اسمبلی نا باسک مولانا ہدایت الرحمان تینا درشان ئسے ٹی پارے کہ کنا اِلہ نا نواسہ نبی بخش نا مار محمد ئے زوانسری بیگواہ کننگانے۔
اسہ پین تدینی ئسیٹی بلوچستان نا بنجائی شار شال ئٹی ہم پاکستانی لشکر اِرا بندغ زورانسری دزگیر کننگ آن گڈ بیگواہ کرینے۔
حوال تا رد ئٹ شاہنواز سمالانی نا مار گزین و علی نواز نا مار ربنواز ئے پاکستانی لشکر شاہرگ نا ہند کھوسٹ آن دزگیر کننگ آن گڈ نادرستو جاگہ ئسے آ درینے و دائسکان اونا ہچ ڈس اف۔
ہندن شال ئنا ہند عیسی نگری آن پاکستانی لشکر نا ڈکھوک ادارہ نا کارندہ غاک عبدالواحد نا مار نودربر بہرام ئے بیگواہ کرینو۔
