ماہ جبین بلوچ نا خاہوت نا کنڈ آن ماہ جبین و اونا ایلم نا آجوئی کن اینو شام ئنا سوشل میڈیا غا کیمپین ئس اڈ تننگ نا پڑو کننگانے۔
بلوچستان نا بنجائی شار شال آن رسینگوک حوال تا رد ئٹ 29 مئی آ پاکستانی لشکر ایف سی و ڈھکوک ایجنسی تا کارندہ آتا دو آن سول اسپتال شال آن بلوچستان نا ہند بسیمہ نا ہندی ماہ جبین بلوچ ئے دزگیر کرسہ تینتو دریسُر، ہرا داسکان پاش کننگ متنے۔
ماہ جبین نا خاہوت تدینی نا رد ئٹ درو شال پریس کلب ئٹی پریس کانفرنس کرسہ پارسس کہ ننا نیاڑی شال ئٹی خواننگ کن رہینگاکہ، ہندن 21 مئی آ ماہ جبین نا ایلم محمد یونس ئے پاکستانی لشکر اونا اُرا غا چھاپہ خلسہ تینتو اوار درے، ہراڑان پد او بیگواہ ءِ۔
خاہوت پارے کہ تومکا ایڑ و ایلم ئے دزگیر کننگ نا وخت آ انتظامیہ نا کنڈ آن ہچو ایف آئی آر و قانودی دستاویز نشان تننگ متو، ماہ جبین و اونا ایلم داسکان پاش کننگ متنو۔
بلوچ یکجہتی کمیٹی، بی این ایم نا بندغی حق آتا ادارہ پانک و ایلو سیاسی ئہ بندغی حق آتا ادارہ آک پاکستانی لشکر نا دو آن بلوچ نیاڑی نا دزگیری آن پد بیگواہی و بلوچستان ئٹی زوراکی نا بیگواہی تیٹ ترندی و بیدس عدالت کھسفنگ نا تدینی تے آ خُلیس نا درشانی ئے کرسہ دہن انگا تدینی تے شیف خلکنو۔
ہندن ماہ جبین نا خاہوت نا کنڈ آن ماہ جبین و اونا ایلم نا آجوئی کن اینو شام ئنا چاگڑدی میڈیا غا کیمپین ئسے نا پڑو کننگانے، ہندن خاہوت جہانی بندغی حق آتا ادارہ غا تے آن خواست کرینے کہ او اوفتا چنا تا آجوئی کن کڑدار ادا کیر۔
