بی این ایم نا بندغی حق آتا ادارہ پانک 29 مئی 2025 آ اسہ آنلائن پریس کانفرنس ئس ایکس آ اڈ تس، ہرانا میزبانی ئے بی این ایم نا بنجائی باسک و پانک ئنا باسک ریاض بلوچ کرے، اوڑتون کمک کن پانک ئنا کوآرڈینیٹر حاتم بلوچ ساڑی اسک۔
پریس کانفرنس ئٹی، بلوچستان ئٹی ریاستی زوراکی، بیدس عدالت خون، زوراکی ئٹ بیگواہ کننگ و بندغی حق آتا لتاڑ نا رد ئٹ شابیت حوال تِہ تننگا۔
ڈاکٹر ناظر نور پارے کہ ہنوکا دہ دے ئٹ بلوچستان نا جتا ہند آتیتون اوار کراچی ٹی ہم کیہی بلوچ آتے زوراکی ئٹ بیگواہ کننگانے، ہرافتیٹ کیہی تا جونک پدا جتا جاگہ آتیان خننگانو۔ دا کُل تدینی تا دستاویزی ثبوت آک ادارہ تون اریر۔
پریس کانفرنس ئٹی مئی نا ایسر ئٹی تیبہ بلوچستان ئٹی ریاستی زوراکی تا تدینی تے بیان کرسا پاننگا کہ 19 مئی آ لیویز کارندہ یونس ئے اُراغان دزگیر کننگا و ایلو دے دروغ ئنا مونتس ئٹی خلنگ مس۔ 21 مئی آ ورنا ساجد ئے زوراکی ئٹ بیگواہ کننگ آن پد جون ئے خسنگ مس۔
بارکھان نا ہند بغاو آن شیر جان کھیتران ئے 22 مئی آ زوراکی ئٹ بیگواہ کننگ آن پد دزگیری ٹی اوڑا بیدادی کننگا و کھسفنگا۔ جون ئے 28 مئی آ خاہوت نا حوالہ کننگا و اوفتِہ برانز آن توننگا۔
مئی 23 آ حنیف ولد عزیز ئے سہب ئنا پنچ بجہ غا اُراغان ہرفِسہ بیست منٹ آن پد اودے کھسفنگا۔
مئی 24 آ حوالکار لالا لطیف ئے اونا چُنا تا مونا سُم تا گواچی کننگا۔ او مُست ہم فوج ئنا دو آن زوراکی ئٹ بیگواہ کننگاسس۔ اونا ایلم خالد نوید (لیکچرار) ئے ہم زوراکی ئٹ بیگواہ کننگاسس۔ 28 فروری 2025 آ لطیف بلوچ نا خاہوت نا دہ بندغ زوراکی ئٹ بیگواہ کننگا، ہرافتیٹ 7 ئنا جون تے 7 مارچ آ خسنگ مس۔ راشد بلوچ (حوالکار لالا لطیف نا ایلُم) ئے 2011 ٹی بیگواہ کننگ آن پد خلنگا۔
مئی 26 آ غوث بخش ئے ملٹری کیمپ آ خواہفنگا و ایلو دے جون ئے تہ بٹنگ مس۔ 26 مئی نا دے زوراکی ئٹ بیگواہ کننگوک آتا جون تے ضلع دُکی ٹی خسنگ مس۔ دا بندغ آتے سلاہ بند تنظیم آتون تفنگ نا کوشست مس۔
اِرا نادُرستو جون نوشکی آن خننگاسس۔
مئی 27 آ آواران ئٹی لشکر کشی نا وخت اُرا اُرا نا تلاشی، بیدادی و سُمکاری کننگا۔ ہراٹی اسہ زالبول و ورناس خلنگ مس و اسہ زالبول ئس ٹپی مس۔
مئی 27 آ اسہ اُرا ئسے آ جلہو کننگا۔ ہراٹی ورنا نعیم و بی بی حوری خلنگ مسُر و اسہ نیمہ وہیئو زالبول ئس ٹپی مس۔ دا خاہوت ئے 10 سال مُست ہم اشتماعی سزا نا گواچی کننگاسس۔
ہنوکا اسہ ہفتہ ٹی بارکھان آن ہفت بندغ نا جونک خننگانو، ہرا مُست بیگواہ کننگ مسنو پدا اوفتے خلنگ آن پد سلاہ بند تنظیم آتون تفنگ نا کوشست کننگانے۔
مئی 28 تربت نا ہند آبسر ئٹی ڈیتھ اسکواڈ سُمکاری کرسا مسافر بلوچ ئے خلک۔
مئی 28-29 ئنا نیامیکو نن کوئٹہ سول اسپتال آن لیبارٹری سائنس ئنا خوانندہ و پولیو نا مریض ماہ جبین ئے زوراکی ئٹ بیگواہ کننگا۔
پانک ئنا سروک دا تدینی تے جہانی بندغ حق آتا کیہی شق آتا لتاڑ پارے، ہرافتیٹ، زند ئنا حق،حقِ تحفظ، آزادی صحافت، زوراکی نا بیگواہی تیان رکھ، بیدس عدلت خون، بندغی حق آتا برخلاف مننگ آ جواب دہی۔
پریس کانفرنس نا ایسر ئٹ سوال و جواب نا سیشن ہم مس ہراٹی کیہی بندغ آک سوال کریر۔ ورندی تے ڈاکٹر ناظر نور و حاتم بلوچ تُسر۔
پانک میڈیا، بندغی حق آتا ادارہ و سول سوسائٹی و جہانی کہول آن خواست کرے کہ اوفک بلوچستان ئٹی برجاء بندغی حق آتا لتاڑ آ سوبری ئٹ پام تیر و زیمی مروکا تا کمک و رکھ ئے ممکن جوڑ کیر۔
