بلوچستان نا ضلع آواران و نوشکے آن پاکستانی فوج و ایجنسیک اِرا ورنا بیگواہ کرینو۔
آواران نا علاقہ جھاؤ ٹی پاکستانی فوج اسہ ورنا ئس دزگیر کرسا بیگواہ کرینے، ہرا رحیم بخش نا مار درمان نا پن ئٹ درست مسنے۔
پن کروک ورنا جھاؤ نا علاقہ چھبی نا جہی ئس ءِ۔ پاننگک کہ اِرا دے مُست پاکستانی لشکر درمان ئے ایلو بندغ آتون اوار کیمپ آ خواہفیسس۔ ایلو بندغ آتے پدان یلہ کننگا ولے درمان ئے توریر۔
جہی بندغ آتا پاننگ ءِ کہ ہرا دے درمان ئے آجو کننگا ہمو دے خاہوت ئے پاننگا کہ او سہب ئنا بریر و درمان ئے ہیڈکوارٹر آ ہتیر۔ درو خاہوت درمان ئے پیشی کن درے، ولے ہراتم او سہب ئنا اُراغا واپس بننگ اس تو کسر آن، کیمپ ئنا خُڑک پاکستانی ایجنسی تا بندغ آک اودے دوارہ بیگواہ کریر۔
خاہوت درمان نا زوراکی نا بیگواہی آ فریشانی نا درشانی کرسا اونا زوت آجوئی نا خواست کرینے۔
ایلو کنڈ آن نوشکے آن حوال ءِ کہ پاکستانی فوج حافظ تارک پنیئو ورنا ئس بیگواہ کرینے۔
پن کروک ورنا نوشکی کازی آباد نا جہی ئس ءِ و اودے 28 مئی 2025 آ اونا اُراغان دزگیر کننگ آن پد بیگواہ کننگانے۔ حافظ تارک اسہ رکشہ ڈرائیور ئس ءِ۔
