بلوچ نیشنل موومنٹ (بی این ایم) نا کنڈ آن، 28 مئی 1998 آ بلوچستان ئٹی پاکستان نا ایٹمی تراک آتا برخلاف جرمنی نا شار گوئٹنگن ئٹی برانزی ریلی ئس کشنگا و ‘ہراتم مَشک ہوغار’ نا سرحال ئٹ اسٹریٹ تھیٹر نا ذریعت ئٹ ایٹمی چکاس آتا بھرم و اوفتا نسخان تے مونا ہتنگ مسک۔
تران کروکاک تران کرسہ پاریر کہ پاکستان نا ایٹمی چکاس آک کس ئنا رکھ کن آخہ بلکن اسہ پد سلوکو قوم ئسے نا برخلاف بیدادی نا گام اسُر۔ دانا سوب آن چاغی نا بندغ آک تابکاری، ناجوڑی و علاقہ آن ہمپ ئہ لڈ نا وڑ انگا عذاب آتے خنار۔ او دے آ بلوچستان نا الس ئنا موکل آن بیدس چاغی نا اسہ کِشت و کشاریئو علاقہ ئسے ایٹمی گند ئٹ مٹ کننگا۔
او پاریر کہ دا چکاس آتا بھرم ئٹی اینو اسکان چاغی نا بندغ آک زہری آ تہو ٹی دم ہلیرہ و زہری آ دیر تے کنیرہ۔ چاغی نا علاقہ کینسر و جینیات ئے زیمی کروکا ناجوڑی تا ہند جوڑ مسنے۔ پاکستان پائک کہ چاغی اسہ غیر آبادو علاقہ ئس ءِ ولے اوڑے 2 لکھ 69 ہزار بندغ رہینگرہ۔ اوفتا اُرا، کشار و تُغک ءُ۔ دا ایٹمی تراک آک بیرہ مش تے آخہ بلکن مخلوق نا زند آتے ہم پھش پھش کریر۔
تران کروکاک پاریر کی 28 مئی مونو دے ئس ءِ۔ دا ہمو دے اسک ہراتم بلوچ نا زند ئے بے نہاد پارسہ ننا وجود ئٹی بمب کھڈ کننگا و داڑا خوشی کننگا۔ ولے ننا قوم بے وسی ئٹ پوہاڑ کرے۔
جرمنی ٹی بی این ایم نا برانز ئٹی پاننگا کہ پاکستان دا ایٹمی چکاس آتے ہندنو علاقہ ئسیٹی کرے کہ ہرا مہالو آن نیستی و زوراکی نا گواچی اسک۔ نہ رکھنگ نا گام ئس ہرفنگا نہ او جاگہ نا بندغ آتے کشنگا و نئے کہ اوسوز نا درشانی ئس کننگا۔ اینو ہم چاغی نا بندغ آک تابکاری نا زیم آتیتو مون تننگ ءُ۔
او جہانی کہول آن پاکستان نا ایٹمی چکاس آتا وخت آ بے پامی و دافتا بھرم ئٹی تابکاری و ماحول نا خراب مننگ آ پٹ ئہ پول و پاکستان نا ایٹمی سلاہ تا برخلاف گامگیج ہرفنگ نا خواست کریر۔
تران کروکا تیٹی بی این ایم جرمنی چیپٹر نا صدر شرحسن بلوچ، نائب صدر صفیہ بلوچ، جوائنٹ سیکریٹری شلی بلوچ، بی این ایم نا باسک آصف بلوچ، فیصل خالد ، اکبر بلوچ و شلی ذاکر اوار اسُر۔
اندا وڑ بی این ایم نا پارہ غان 28 مئی آ چاغی ٹی پاکستان نا ایٹمی چکاس آتا رد ئٹ نیدرلیڈ، واشنگٹن ڈی سی ٹی وائٹ ہاؤس نا مونا، لندن ئٹ برانز، چائندئی مہم و ورکشاپ اڈ تننگا۔ اندا وڑ بلوچستان نا جتا علاقہ تیٹ پمفلٹ ہم بشخنگا۔
