بی ایل اے نا ترجمان جیئند بلوچ میڈیا ٹی شنگ کروک تینا درشان ئسیٹی پارے کہ ننا صف تا اسہ سینئر، مخلص و دلیر آ کمانڈر ملک خان مری ولد میرو خان مری نا کذیت آ بھاز فریشانی نا درشان کینہ و اونا کذیت نا حال ئے راج ئنا با سماء انگا مخلوق ئے سر کینہ۔ او کیہی وخت آن بی ایل اے تون اوار اسک، و تینا زند ئنا ایسر اسکان اندا راجی فرض اتون اوار اسک ہرانا بنیات قربانی، شعور و نظریاتی وابستگی تون اسک۔
ترجمان پارے کہ کمانڈر ملک خان محمد مری اسہ اُندنو خاہوت ئسے آن سیالی تخاکہ ہرانا مزاحمتی دیہاڑ بلوچستان نا یاداشت ئٹی پھاشو حوالہ ئس ءِ۔ اونا پیرہ خان مری انگریز سامراج نا برخلاف ہڑب نا ہند آ مروکا پنی آ جنگ ئٹ مزاحمت کرسا شہید مس، ہرا دا خاہوت کن اسہ انقلابی دود ئسے نا بناء اسک۔ اندا دود ئے اونا بھلا ایلُم غلام نبی مری نواب خیر بخش مری تون اوار مرسا 1973 نا سلاہ بند جہد ئٹی بشخ ہرفے و تینا زند ئنا ایسر اسکان نواب مری نا خُڑک ئنا سنگت اسک۔ اوکان پد قبیلہ نا دستار ملک خان محمد مری ئے تننگ مس۔
ملک خان مری، ورنائی ٹی منہ سنگت آتون سن 58 ئنا مزاحمت ئٹی نواب نوروز خان نا دزگیری آن پد، اونا سنگت آتا کُمک کن کوہلو آن جھالاوان اسکان پندہ بس و تینا مزاحمتی زند ئنا بناء ئے کرے، اوکان پد او تیبہ زند بلوچ راجی تحریک آجوئی نا متحرک انگا سپاہی اسک۔او نہ بیرہ نواب نوروز نا تحریک نا گواہ اسک بلکہ شریک دار ہم اسک، و اونا زند اندا استقامت نا نشانی اسک ہرادے نا وختی لالچ نا حالت آک بدل کریر۔ اونا ُچنا ظفر مری برجاء انگا بلوچ راجی تحریک ئٹی شہید مس و او تینا خاہوت نا کیہی شہید آتا ڈکھ ئے سگا۔
ترجمان مُستی پارے کہ کمانڈر ملک خان مری شہید استاد اسلم نا خُڑک انگا سنگت آتیٹی اوار اسک۔ 2005 آن اسلم بلوچ بولان کیمپ ئنا کمانڈر نا حیثیت ئٹ راجی جہد ئنا بھلنی ئے کننگ اسک، ہمو وخت آن ملک خان مری نہ بیرہ اُستاد نا خُڑک مس بلکہ اونا راہشونی و صلاح نا فکری کُمک ہم مس۔ دا خُڑکی وختی حالت یا مجبوری نا الو بلکہ نظریاتی اسک و وخت اتون اوار پین مہکم مس۔ وختس شہید اسلم بی ایل اے نا پوسکنا تنظیم نا بناء کرے و تحریک و تنظیم ئے ادارہ جاتی و انقلابی ہاٹی نا عمل نا بناء ئے کرے گُڑا ملک خان مری ہمو کمانڈر تیٹی اسک ہرافک قبائلی دود، خاہوت، سیالی و ہندی فائدہ تے رد کرسا دا بدلی نا شعوری حوالہ ئٹ ہمراہ مس۔ او ہمو بندغ آتیٹی اوار اسک ہرا اسلم بلوچ نا نظریہ ئے نہ بیرہ قبول کریر بلکہ ایسر دم اسکان ہنداڑتون تفوک اسک۔ اونا اواری نظریاتی اسک ہرادے اسلم بلوچ استقلال و انقلابی تنظیم سازی ئٹ تحریک نا روح ئٹی اوار کریسس۔ بی ایل اے نا اولی تنظیمی ہاٹی نا بے توار انگا تعمیر و خراب انگا حالیت تیٹ، پوسکن انگا تنظیم اسکان ملک خان ہمو کڑدارتے پورو کرے ہرادے ہمو بندغ آک چارہ کہ تحریک نا عمل ئٹی اوار مسنو۔ اونا زند بیرہ جنگی نہببلکہ فکری، چاگڑدی و سیاسی و تنظیمی اسک۔
اونا کذیت بھلو وخت ئسے نا ناجوڑی آن پد 86 سال ئنا عمر ئٹی مس و تنظیمی فیصلہ نا رد ئٹ اونا گُڈی ہند راجی شرف و احترام تون کننگا، اینو اونا یات ئے دروت ندر کننگ ءُ تاکہ اونا خدمت آک راجی یاداشت نا بشخ مریر۔ اونا کذیت نہ بیرہ تنظیمی صدمہ ئس ءِ بلکہ تحریک نا ہمو کڑدار تا چیدہ ءِ ہرا بے تواری ئٹ دیہاڑ نا رُخ ئے بدل کننگ ئٹی تینا کڑد ئے سر تسنو، اونا کذیت ننے بھلو کمی ئسے نا احساس تیک ولے اونا زند ننے اندا ہیل تیک کہ کڑدارک کذیت کیرہ ولے نظریہ، قول و قربانی نا لڑ برجاء مریک۔
ترجمان ایسر ئٹ پارے کہ اونا خاہوت، خُڑک ئنا سنگت و ہمو کُل باسک آتون تعزیت نا درشان کینہ ہرافک ملک خان محمد مری کونو رہشون ئسے نا بھلنی ٹی جہد کرینو۔ نن اونا نظریاتی وارث مننگ آ دا قول کینہ کہ اونا یات و جہد ئے تنظیمی نصاب و یاداشت ئٹی رکھیفنگ مرو۔
