بلوچ نیشنل موومنٹ نا پارہ غان، 28 مئی آ بلوچستان نا علاقہ چاغی نا مش راسکوہ ئٹ پاکستان نا ایٹم بمب آتا چکاس و علاقہ ئٹ اوفتا زہم ئنا رد ئٹ اسہ پمفلٹ ئس شنگ کننگانے۔
پمفلٹ ئٹ پاننگانے کہ پاکستان گیشتر ہندا دعوی ئے کیک کہ او بھارت نا ایٹمی چکاس آتا ورندی ٹی ایٹمی تراک کرینے، ولے راستی داد ءِ کہ پاکستان بھارت نا ایٹمی تراک آتیان مہالو ایٹم بمب جوڑ کننگ نا فیصلہ کریسس۔ پاکستان ایٹمی توانائی کمیشن نا باسک و چاغی ون تراک کروکا سائنسدان آتا ٹیم ئنا بھلا ڈاکٹر ثمر مبارک مند نا رد ئٹ 1972 ئٹی ہمو وخت ئنا وزیر اعظم ذوالفقار علی بھٹو ڈیہہ ئنا سائنسدان آتے ملتان ئٹی مُچ کریسس” تو اوڑے نن حقیقت ئٹی ایٹمی سلاہ جوڑ کننگ نا قسم کنگُسُن”
پمفلٹ ئٹ ودیک پاننگا کہ پاکستان نا جوڑ کننگ اسہ غیر فطری ونڈ مننگ ئسے نا بھرم ءِ، ہرانا دارومدار مذہبی بنیات آ نفرت و بیرہ پن ئنا نظریاتی سرحد آتا رکھنگ آٹے۔ ہندا بنیات دادے مدامی اسہ فوجی ریاست ئس جوڑ کیک۔ ہرا تینا وجود کن چرجوئی ئٹ پیشن نا دشمن جوڑ کننگ ئٹی ءِ۔ اگہ پاکستانی فوج دہن کپ تو تہہ ئنا جیڑہ آتیتو مون تننگ اوڑکن مشکل مرو۔ انتئے کہ پاکستان محکوم آ قوم آتا ڈغار آ برجاء ءِ ہرا دا ریاست آن آجوئی خواہرہ، ہندن بلوچ قوم ہم تینا آجوئی کن نت دو خلنگ ئٹی ءِ۔
اندن نوشتہ اسک کہ 28 مئی 1998 آ پاکستان ضلع چاغی نا مشی آ سلسلہ "راسکوہ” ٹی ایٹمی تراک کرے۔ ہرا دوستان وڈ نا دیہات چھتر تو مون پہ مون ءِ۔ دوستان وڈ 344 مربع کلومیٹر نا کچ شابیتو جاگہ ئس ءِ۔ دا عیلاقہ غیر آبا پاننگا، ولہ حقیقت ئٹی نہ بیرہ داڑے ہزار آتا کچ بندغ آک رہینگرہ بلکن دا مشک دیر ئنا قدرتی مڈی و ہندی حیاتی نا ذریعت ءُ۔
چاغی نا تیبہ آبادی 2023 نا مردم شماری نا رد ئٹ 2 لکھ 69 ہزار ءِ۔ دا جاگہ نا زمین، مش جھل و ڈغار نا تہہ ئنا دیک ہندی بندغ آتا مال داری و زمینداری نا بنیاتی آ سہارہ کو۔
اندن نوشتہ کننگاسس کہ دا چکاس آ تیان پد چاغی و خڑک ئنا علاقہ آتیٹی تابکاری نا زیم آتیان کینسر، سل ئنا ناجوڑی و دم ئنا ناجوڑیک لس مسنو۔ ہندن پاننگ کہ ڈغار نا تہہ ئنا دیرک ہم زیم آتیان خراب مسنو۔ ہندی میڈیا و تنظیم آک دا جیڑہ تے مونا ہیسنو۔ ولے ریاست نہ بیرہ پٹ ئہ پول آن تینے تورے بلکن زیمی مروکا تا کمک کننگ آن ہم نمن کرے، حقیقت ئٹی دا بلوچستان ئٹی ایٹمی چکاس آخہ بلکن بلوچستان آ ایٹمی جلہو اسک۔
پمفلٹ ئٹ شابیتی ئٹ پاننگا کہ پاکستان چرجوئی ئٹ رکھ و جنگی تیاری تا پن آ الس ئنا مڈی تے فوجی ادارہ تے آ خڑچ کنگ ئٹی ءِ۔ دانا بھرم دادے کہ:
خواننگ، جان جوڑی و پوریا وے مننگ نا کچ ءِ۔
الس نیستی و محرومی نا گواچی ءِ۔
ہمسایہ ڈیہہ تیٹی مداخلت و مشکل ودی کننگ مریک۔
ایٹمی تاغت مننگ نا پڑو و ہمسایہ ڈیہہ تے ایٹمی جلہو نا تڑی تننگ حقیقت ئٹی پورو علاقہ کن اسہ بھلو خطرہ ئس ءِ۔
جہانی ایلمکو آن خواست کننگا کہ پاکستان کونو غیر مستحکمو ڈیہہ ئسینا دو ٹی ایٹمی سلاہ تا مننگ جہانی امن کن خطرہ ءِ۔ بندغ آتا رکھ کن المی ءِ کہ پاکستان ئے جہانی تاغت آتا بھلنی ٹی ایٹمی تاغت آن محروم کننگ مرے۔ بلوچستان ئٹی ایٹمی چکاس آ تے آن زیمی مروکا تیکن پٹ ئہ پول و کمکی گام ہرفنگ مرے۔ دا بیرہ بلوچستان نا آخہ بلکن بندغی سلامتی نا سوال ءِ۔
