بلوچستان نا ضلع لورالائی آن رسینگوک حوال تا رد ئٹ پاکستانی لشکر اسہ پین دروغ نا مونتس ئسیٹی چھار بندغ ئے کھسفینے، کھسفنگ مروک بندغ آک کوہ ِ سلیمان نا قبائلی علاقہ بارتھی نا ہندی ءُ و اوفتا تعلقداری بزدار قبیلہ آن ءِ۔
حوال تا رد ئٹ دا بندغ آتے منہ وخت مُست پاکستانی لشکر زوراکی ئٹ بیگواہ کریسس۔ کھسفنگ مروک ورنا تیٹی اکبر بزدار، سلیمان بزدار، ملک احمد بزدار و بخت محمد بزدار اوار ءُ۔
ہندی حوال تا رد ئٹ دا بندغ آتے استو سی ٹی ڈی دروغ نا مونتس ئٹی کھسفینے۔ رپورٹ نا رد ئٹ کھسفنگ آن پد اوفتا خڑک آ ہندن سلاہ تخانگاسس کہ اوفتے دہشتگرد ظاہر کننگ مرے۔
تیبہ بلوچستان ئٹی پاکستانی لشکر نا کنڈ آن دروغ نا مونتس آتا چرجوئی برجاء ءِ، ہرافتیٹی بیگواہ کننگوک بندغ آتے کھسفنگ نا تدینیک گیشتر مسنو۔
زوت ئٹ رسینگوک حوال تا رد ئٹ منہ دے مُست بارکھان ئٹی اسہ دروغ نا مونتس ئسیٹی مسہ بندغ ئے کھسفنگا۔ اوڑان گُڈ ضلع آواران ئٹی پاکستانی لشکر اُرا تے آ چھاپہ نا وخت آ سمکاری کرسہ اسہ نیاڑی ئسے تون اوار ارا بندغ ئے کھسفے، ہندن اسہ پین نیاڑی ئس بھاز ٹپی مسک۔ دا تدینی تا برخلاف تیبہ آواران ئٹی شٹر ڈاون ہڑتال مننگ ئٹی ءِ۔
