بلوچستان نا ضلع بارکھان نا علاقہ تنگ کریر ئٹی اینو سہب ئنا سی ٹی ڈی نا اسہ دروغ ئنا مونتس ئسے آن گڈ مُسہ جون رکنی بی ایچ یو اسپتال آ ہتنگا، ہرافتا چائندئی ہمو بندغ آتا پن ئٹ مسنے ہرا مُست آن بیگواہ کننگاسُر۔
جون تا چائندئی راڑہ شم نا جہی فیض محمد بزدار نا مار عبدالرحمن بزدار، راڑہ شم نا جہی رحیم بزدار نا مار فرید بزدار و عیدو مری نا مار سلطان مری نا پن تیٹ مسنے۔
جہی حوال تروکا تا پاننگ ءِ کہ دا بندغ آک کیہی تُو آن بیگواہ اسُر۔
سی ٹی ڈی نا ترجمان نا رد ئٹ، بارکھان نا علاقہ تنگ کریر ئٹی کارروائی نا وخت آ سلاہ بند بندغ آتون سمکاری ٹی اِرا بندغ کھسفنگا، و اوفتا ایلو سنگت آک نرار۔
ترجمان دعویٰ کرے کہ کھئوکا بندغ آتا کوزہ غان اِرا کلاشنکوف، اسہ پستول و اِرا بمب دو بسنو و اوفتا تعلقداری سلاہ بند تنظیم آتیان ءِ۔
واہم، خاہوت و بلوچ تپہ آتا پاننگ ءِ کہ دا اسہ دروغ ئنا مونتس ئس ءِ، ہراٹی اوفتا مُست آن بیگواہ کننگوک بندغ آتِہ کھسفنگانے۔
