شہید سیکنڈ لفٹیننٹ نوکاپ جان نا یات ئس| مبارک بلوچ
نوشت: مبارک بلوچ
زرمبش براہوئی
جہان ئٹی بھاز بندغ ودی مریک او زند کیرہ ولے پدا چُپی ئٹ دا جہان ئے اِلیرہ کارہ۔ ولے ہرا بندغ تینا زند ئے اسہ مسخت ئسے کن ندر کیک اونا زند بیرہ تینا زات ئکن نہ بلکہ اسہ بروکو نسل ئسے کن روشنو کسر ئس مریک۔ بلوچستان نا دیہاڑ ئٹی ہندنو کڑد ارے۔ ہراکہ لُمّہ وطن نا آجوئی نا تُغ ئے گواچن ئٹ بدل کننگ کن تینا ساہ تے ندر کرینو ہرافتیٹی اسٹ ئس شہید اشرف عرف نوکاپ بلوچ ءِ۔ او بیست و دو سال ئنا وہی ٹی راج ئکن ندر مس۔
شہید نوکاپ نرمزار و دلیر آ سرمچار مراد بخش نا مار ءِ، او مشکے نا جہی ئس ءِ و چنک آ سن ئٹی گلزمین کن سالونک مِرسہ مدام زندہ سلیس۔ سیکنڈ لفٹیننٹ شہید نوکاپ ریحان نا منہ یات اریر ہرافتِہ قلم بند کننگ خواوہ۔
اسہ وخت ئس ای شہید نوکاپ جان ئے اسہ جاگہ ئسے آ خناٹ، او کنا چنکی نا سنگت مسُنے کنا اونا چنکی اسہ شار ئٹی گدرینگا۔ او ہچ خوانتوسس، مش ڈل تیٹی اونا خلک اسک و اودے ای ہرا وختا خناٹہ او پاریکہ بلوچستان نا تہٹی زوراکی مننگ ءِ بلوچ نا زنک ایسری مننگ ءِ، ہڑدے بلوچستان نا کنڈ کنڈ آ بلوچ اُلس ئے کوزہ گیر پاکستانی لشکر زوراکی ئٹ بیگواہ کننگ ءِ، ہڑدے ورنا تا جُشوک جونک گیابان تیٹی بٹنگ مننگ ءُ، بلوچ اُلس ئنا خلک آک ہشنگ مننگ ءُ، مڈی تا لُٹ ئہ پول دا کُل زورگِر آ پاکستانی لشکر تینا پنجاب ئے آباد کننگ کن کننگ ءِ، بلوچستان ئے غیر آباد کننگ کن کننگ ءِ۔ دا کُل ننا نزوری نا سوب آن مننگ ءُ اگہ نن کُل آجوئی نا جنگ ئتون اوار مرین تو زوراک آ پاکستان نزور مرو۔
او تینا چنکا سن ئٹی بلوچستان نا زور ئنا کوزہ و بلوچ راج ئتون مروکا بے انصافی نا برخلاف 2015 ٹی بلوچستان لبریشن فرنٹ (بی ایل ایف) نا پلیٹ فارم آن بشخ ہلک و بلوچ راج ئنا اسہ گوریلا سرمچار ئس مس۔ او بلوچستان نا کنڈ کنڈ آ دشمن ئے باء تِس۔ بھاز وخت دشمن نا سُم تا مون ئٹی تینے تِرِسہ ٹپی مس ولے تینا سنگت آتے کسر تِرِسہ مونا درے۔ او تینا راجی ذمہ وارے تِہ جوانو رنگ ئسے ئٹ ایسری تس۔ او تینا جنگی گشاد و، چائند نا سوب آن بھاز زو بی ایل ایف نا سیکنڈ لفٹینٹ نا تیبر آ سر مس۔
اسہ دے ئس کنا موبائل آ پوسکنو نمبر ئسے آن فون ئس بس ای فون ئے ارفیٹ۔ مون آن توار بس کہ ای نوکاپ اُٹ۔ خیر نن ہڑتُما ہیت کرین ولدا او پارے کہ ابا باسد جان تینا سنگت آتون اوار شہید مسُنے اوفک امرو جوانو پن ئس الانو کنے ہُر ای امرو بد بخت ئسے اُٹ کہ ای مُسہ جاگہ غا سُم کننگُنٹ ولے وطن کن شہید متوٹ۔ کنے اونا ہیت آن ڈکھ مس ای پاریٹ کہ اللہ نے رکھے ہراتم بلوچستان ئے نا دتر نا ضرورت مس گُڑا وطن کن سالونک مروس۔
26 مئی 2024 آ آواران نا ہند نوندڑو ٹی زوراک آ پاکستانی لشکر نا کیمپ آ جلہو کننگ نا وخت آ نوکاپ جان تینا سنگت آتون اوار دشمن لشکر تون چھار ساہت اسکان جنگ تِس۔ دا جلہو ئٹی زوراک آ پاکستانی لشکر نا کیہی کارندہ غاک مرگ ئنا گواچی مسر جلہو آن پد پاکستانی لشکر نا پنچ چوکی و بھلا کیمپ ئنا سنگرک بھُس مَسُر ہموڑے نوکاپ جان شہید مس۔
نوکاپ جان اینو ننے الا پین ہند ئسے آ ہنا او دیہاڑیئو اسہ پن ئس کٹّا۔
