25 مئی 2019 آ پاکستانی لشکر علاؤالدین کشانی ئے نوشکی نا علاقہ بھٹو آن زوراکی ئٹ بیگواہ کرے۔ اینو اونا زوراکی نا بیگواہی ئے شش سال پورو و ہفتمیکو سال بناء مس، ولے دائسکان او آجو مننگ کتنے۔
علاؤالدین کشانی کوئٹہ ڈگری کالج نا خوانندہ و دالبندین نا علاقہ کلی قاسم خان نا جہی ئس اس، خواننگ کن کوئٹہ ٹی رہینگاکہ۔
خاہوت نا پاننگ ءِ کہ اونا زوراکی نا بیگواہی ننے سخت ذہنی، جسمانی و نفسیاتی اذیت ئٹ شاغانے۔ دا شش سال ئٹ نن ہرا دڑد، بے باوری و انتظار ئے سگانُن، او لوز آتیٹ درشان مننگ کپک۔
خاہوت نا پاننگ ءِ کہ اگہ علاؤالدین کشانی بےقانودی کاریم ئس کرینے تو اودے عدالت ئٹ ہتنگ مرے تاکہ قانود نا رد ئٹ اوڑا کارروائی مرے۔ ولے اگہ او بےڈوہ ءِ تو اودے دمدستی آجو کننگِہ۔
او ریاستی ادارہ غا تیان اونا آجوئی نا خواست کرینو و بلوچ الس، بندغی حق آتا جہانی ادارہ، سول سوسائٹی و باسک آتیان خواست کرینو کہ او علاؤالدین کشانی نا آجوئی کن توار بڑز کیر، تاکہ دا بےڈوہ آ ورنا زوراکی نا بیگواہی و ٹارچر سیل آتیان آجو مرے و اونا خاہوت جارات نا دم ہلے۔
