بلوچستان نا ضلع کیچ، گوادر و کوئٹہ آن پاکستانی لشکر پنچ بندغ دزگیر کرسہ زوراکی ئٹ بیگواہ کرے۔
ضلع کیچ ئنا بُنجاہی شار تربت آن پاکستانی لشکر بلوچ نیشنل موومنٹ (بی این ایم) نا بُنجاہی فنانس سیکریٹری ناصر بلوچ نا اُراغا چھاپہ خلسہ اونا ایلم نا مار عدنان ئے دزگیر کرسہ بیگواہ کرے۔
حوال تروک نا رِد ئٹ چھاپہ نا وخت آ پاکستانی لشکر تیبہ اُرا ئے پٹ ئہ پول کرسا نیاڑی و چُنا تیا لٹ و کُٹ کرے۔ خاہوت عدنان نا زوت آجوئی نا خواست ئے کرینے۔
اندن ریک پُشت، پسنی نا جہی رحمت نا مار شوکت و اللہ داد نا مار گوہر بخش ئے پاکستانی لشکر دزگیر کرسہ بیگواہ کرے۔ گوہر بخش و شوکت حجام نا دُکان ٹی کاریم کریرہ۔ 24 مئی آ اوفتے جتا وخت آ زوراکی ئٹ بیگواہ کننگانے۔
حوال تِروک آتا رِد ئٹ شوکت ئے درو سُہب ئنا وخت آ و گوہر بخش ئے درو دے کیہلنگ نا وخت آ حجام نا دُکان آن پاکستانی لشکر دزگیر کرسہ بیگواہ کرینے۔
ایلو کنڈ آن پسنی وارڈ نمبر 3 آن کہدہ امان اللہ محلہ نا جہی کریم بخش نا 20 سالی آ مار عبدالسلام ئے اِستو ہموتم پاکستانی لشکر زوراکی ئٹ بیگواہ کرے ہراتم او فش ہاربر جیٹی آن مچی ہلنگ کِن دریا غا ہننگ ئٹی اس۔
عبدالسلام نا لُمہ پارے کہ کنا مار اسِہ خواری کشوک (محنتی) و مچی ہلوک ئس ءِ و کنا بے ڈو ءِ۔ اونا ہچو بےقانودی کاریم تیٹی دو اف۔ او تینا مار ئنا زوت آجوئی نا خواست ئے کرینے۔
کوئٹہ نا علاقہ سریان آن عمیر بلوچ ئے 21 مئی نا نن اونا اُراغان پاکستانی لشکر دزگیر کرسہ بیگواہ کرے۔
