رؤف جان تون منہ یات (ارٹمیکو بشخ)
نبشتہ کار: سوبین بلوچ
براہوئی مٹ: ماہین بلوچ
زرمبش براہوئی
او وار وار آ گڑاس نہ گڑاس سوج کننگ اس کہ دا اخّس مُر اسکان نشان ایتک، امر سیٹ مریک۔ گُڑا اُستاد ہم غٹ گڑا تِہ اسٹ اسٹ آ پاننگ اس، انداڑے ای خناٹ کہ رؤف اندا ترمل ئے تینا دوٹی کرے و ہُرا۔ اندا ہیت ئے کرے کہ یار دادے زو ہیل کروئی ءِ، انتئے کہ داڑ ئٹ جنگ کننگ مزہ ایتو و دژمن زیات نسخان کنو۔
خیر ٹریننگ چُھٹا، غٹ سنگت آک بش مسُر۔ ای ہُریوہ کہ رؤف دائسکان تولوک ءِ، ہمو وڑ سوج کننگ ءِ۔ زرہ ئسے آن پد ای توار کریٹ کہ بر اڑے داڑے، اسہ دے آ کس مُلا مفک۔ نی اخس سوج کیسہ، نی پکا کہنگ نا تیاری کرینُس۔
تینا سر سوج آن گڈ و بس و کنا رہا توس، پارے کہ اڑے ترمل ئے ای بڈ کیوہ۔ اندنی ٹی سنگت ئس ننے توار کرے کہ ببو اِرغ کُنین۔ گڑا اِرغ کُننگ آن پد لشکر اِرا دھر ئٹ بشخ مس، اسہ دھر ئس پیشتما کاریم نا پارہ غا، نن ہموڑے وتاخ ئٹ اسُن کہ نا گمان آ جھمر ہورنگ بناء کرے و شنزہ بناء مس۔ نن دنیا نا غم آن بے غم تینا سفر نا انتظار ئٹ اسُن، ای خناٹ کہ انداڑے رؤف تولوک اس و فون ہُننگ اس۔ ای کہ اوڑان خُڑک مسُٹ گُڑا رؤف نا مونا کتاب ئس اس۔ نن اندا بیواک آ بندغ آک، گُڑا ای مخہ و مسخرہ ئٹ سوج کریٹ کہ نا اڑے امر واک ہلیک خواننگ آ۔ نی چَڑہ کتاب آتون سر مہ سر اُس گنوک مروس۔ دا پِھر ئنا مُد ئٹ بر مش ئنا ٹُل آ کان تولِن۔
گُڑا او مخا و پارے اڑے کنے کتاب خواننگ و شائری نا بھاز شونق ارے۔ رؤف ئے خواننگ نا سخت شونق اس، ساندہ وتاخ ئٹ فارغ وخت آ کتاب خواناکہ و براہوئی نا کتاب بھاز خواناکہ۔
خیر! نن اوار مش ئنا ٹُل ئنا پارہ غا پیستمان، نن خلق ئنا کنڈ آ دورگند کرین۔ و شور ئنا زیبائی نا رد ئٹ گڑاس ہیت کرین کہ انداڑے سنگت ئس توار کرے و پارے کہ رؤف بر شیف کان گشت ئسے آ۔ نن مش آن شیف دھڑنگان، اوکان پد رؤف سنگت آتون سفر ئسے آ پیشتما۔
نن وتاخ آ سنگت آتون بسُن کہ اراتم سنگت آک ننے حال ایتور، ای ہم جنگجاہ ئنا پارہ غا کاو۔ اِرا دے آن پد ای و پین سنگت ئس نیٹورک آ ہنان کہ سنگت آتا حوال ئے ہلین، گڑا سنگت آک ننے پاریر کہ ببو۔ نن وتاخ نا سنگت آتِہ ہفین و سنگت آتا پارہ غا راہی مسُن۔
برجاء ءِ۔۔۔
