کوئٹہ آن زوراکی ئٹ بیگواہ کننگوک خوانندہ ایمل نا لُمہ کوئٹہ ٹی پریس کانفرنس کرے و تینا چُنا نا آجوئی نا خواست کرے۔
بلوچستان نا بنجائی شار شال آن پاکستانی لشکر نا دو آن زوراکی ئٹ بیگواہ کننگوک خوانندہ ایمل ولد اورنگزیب نا خاہوت نا رد ئٹ اودے اُراغان خاہوت نا مونا دزگیر کرسا نادُرستو جاگہ ئس دننگانے۔ خاہوت نا رد ئٹ تدینی آن پد ایمل دائسکان بیگواہ ءِ۔ بیگواہ کننگوک خوانندہ نا لُمہ اینو وی بی ایم پی نا برانزی کیمپ آن اسہ پریس کانفرنس ئسیٹی تینا چُنا نا زوت آجوئی نا خواست کرینے و ریاستی ادارہ تا کاروائی ئے بیدس قانود پارینے۔
حوالکار تیتون ہیت کرسا او پارے کہ اسہ لمہ ئسے نا ارمان تون اوار ای داڑے نما مونا سلوک اُٹ، کنا سینہ نا چراغ کنا مار ایمل اسہ خوانندہ ئس ءِ و اودے استو سادہ پُچ آتیٹی سلاہ بند کارندہ غآک کنا مونا ہرفیر دریر، نہ وارنٹ، نہ پین قانودی حکم نامہ اس، بس توفک و نہاری روشت تخنگا۔ نن ریاستی اغواء کار تیان سوال کرین ننے دڑکو و کرینگ تننگا و موبائل فون تے پُلار تاکہ نن کس ئے حوال تننگ کپن۔ کنا چُنکا مسڑ فاطمہ ہرا اسہ باشعور و بہادرو مسڑ ئس ءِ ہرا بیگواہ کننگوک بلوچ آتیکن ساندہ توار بُڑز کیک، پُر ایمن برانز و جلسہ تیٹی اوار مسُنے دا ہمو ڈوہ ئنا سزا ءِ کہ اونا ایلم ئے بیگواہ کننگانے؟ انت دا ڈیہہ ئٹی ریاستی راہبند نا رد ئٹ تینا بندغ آتا آجوئی نا خواست ہم قابل برداشت اف؟
ماہ جبین ایسر ئٹ ریاستی ادارہ و کالخواہ تیان خواست کرسا پارے کہ اگہ اونا مار ڈوہ ئس کرینے اودے عدالت ئٹی ہتنگ مرے و چادر و چار دیواری نا شرف ئے لتاڑوکا تے قانون نا تلہ غآ ہتنگ مرے کنا مسڑ و ایلو چُنا تا سلامتی نا باور تننگ مرے، زوراکی ئٹ بیگواہی نا وڑ انگا زوراکی تے ایسر کننگ مرے و زیمی مروکا خاہوت آتے انصاف تننگ مرے۔ نن چُپ مفرون و دا جہد ئے ہموتم اسکان برجاء تخون ہراتم اسکان کہ کنا مار آجو متنے۔ او حوالکار، بندغی آتا باسک و بلوچستان نا اُلس آن دا جہد ئٹی اوار مننگ نا خواست کرے۔
