بلوچستان نا ضلع مستونگ نا علاقہ کلی دتو ٹی پاکستانی لشکر نا دو آن اسہ بندغ ئس دزگیری آن گڈ بیگواہ، خاہوت برانز کرسا کوئٹہ آن کراچی آ ہنوکا بنجائی کسر ئے ہر وڑ ئنا ہن ئہ بر کن بند کرینے۔
جہی حوال تروکا آتا رد ئٹ ہفتہ نا دے سہب ئنا 5 ئنا وخت آ فرنٹیئر کور و کاؤنٹر ٹیررازم ڈیپارٹمنٹ محمد زمان نا مار عابد حسین ئے اونا اُراغان دزگیر کرسا بیگواہ کرینے۔
ورنا نا خاہوت و جہی مخلوق اونا زوراکی نا بیگواہی نا برخلاف مستونگ نا علاقہ شہید غلام علی چوک، رحمان ہوٹل نا خُڑک، تولوک برانز بناء کرینو و کسر ئے ہر وڑ ئنا ہن ئہ بر کن بند کرینو۔
برانزی تا خواست ءِ کہ عابد حسین تون اوار غُٹ بیگواہ کننگوک بندغ آتے آجو کننگِہ۔
او الس آن ہم خواست کرینو کہ او “ریاستی زوراکی” تا برخلاف توار بُڑز کیر۔ دا بیرہ عابد حسین نا ویل اف، بلکہ ہر ہمو بندغ نا دڑد ءِ ہرا زوراکی نا بیگواہی تا گواچی کننگانو۔
