ضلع آواران نا تحصیل مشکے ٹی استو ننکان پنی آ حوالکار و انتخاب اخبار نا نمائندہ عبداللطیف ولد جان محمد ئے ریاستی کارندہ غاک اونا اُرا ٹی نن ئنا سئے بجہ غا خاہوت نا مونا سُمکاری کرسا کھسفیر۔
بی وائی سی نا سروک و بندغی حق آتا باسک سمی دین نا رد ئٹ اینخو 28 فروری آ عبداللطیف بلوچ نا خاہوت نا ہشت ورنا آرمی کیمپ آ خواہفنگاسس۔ اوفتیٹ مُست چھار و پدا ایلو چھار انگا ورنا تے کھسفِسہ اوفتا جون تے بِٹنگا۔ کھسفنگ مروکا تیٹی عبداللطیف نا مار، سیف بلوچ ہم اوار اسک۔
او پارے کہ بلوچستان ئٹی انسانیت سوز تدینی تا لڑ ہڑدے گیشتر مرسا ءِ ولے پاکستانی حوالکار، بندغی حق آتا علمبردار و ریاستی ادارہ غاک دا حالیت آ بے توار ءُ، دا ہم لس بندغ اسُر ہرافتے اوفتا اُراتیان تُغ ئٹی خلنگا گُڑا دافتا انتئے بے تواری ءِ؟ بس اندا سوب آن کہ دافک بلوچستان نا ہندی ءُ یا اندا سوب آن کہ دافتا سیالی تاغت تخوکا ادارہ یا اثر و رسوخ تخوکا خاہوت آتیان اف؟ وختس نن دا زوراکی تا برخلاف توار بُڑز کینہ ننے پراکسی و دہشتگرد پاننگک۔ نن ہر وخت لس بندغ آتا خون ئنا مذمت کرینن اگہ دا عمل ئے ریاستی ادارہ غاک کرینو یا بے ریاستی ولے ہرا ننے آن پرتشدد تدینی تا مذمت نا خواست کیرہ اوفک ریاستی ادارہ تا دو آن مروکا بندغی حق آتا لتاڑ آ بے توار ءُ، انتئے اوفک ریاستی ادارہ تیان دا ڈوہ تیا سوال کپسہ؟
سمی دین مُستی پارے کہ ہمو بندغ آک، ہرا ریاستی ادارہ غاتا دا بے بندغی ڈوہ تیا بے توار ءُ، راستی ئٹ جانبدار ءُ۔ اوفتا حوالکاری بندغ حق آتیکن اسہ پارہ غان ءِ۔ او بے ریاستی بندغ آتا میار ئے خنِرہ ولے ریاستی کارندہ غا تا ڈوہ تیا اوفتا خنک بند مریرہ۔
او ودیک پارے کہ بی وائی سی آ پروپیگنڈہ و رد تروک بیانیہ شنگ کننگ نا جاگہ غا پاکستان مین اسٹریم میڈیا بائد ءِ کہ بلوچستان ئٹی برے و شفاف رپورٹنگ کے و ہُرہِ کہ بی وائی سی ہرا دوبہ غاتے خلنگ ءِ او راست ءُ یا نہ۔ بس اندا دروشم ئٹ نن منّون کہ نُما حوالکاری و سیاست غیرجانبدار ءِ نہ تو دا بے تواری، جانبداری و زوراکی تا مُختفی پوہ مننگ مرو۔
