رؤف جان تون منہ یات (اولیکو بشخ)
نبشتہ کار: سوبین بلوچ
براہوئی مٹ: ماہین بلوچ
زرمبش براہوئی
ای رؤف جان نا بارو ئٹ ہخس نوشتہ کیو ہموخس کم ءِ، رؤف نا کڑد کن کونا نزور آ بندغ تون درشان مننگ کپک۔ ولے اُست پائک کہ اونا گڑاس یات نوشتہ کیو۔
شورّ نا دلبند ئٹ ای و رؤف جان اسہ دے تینا نت تِہ تخان و بلوچ راجی کُنگر آتون اوار مسُن۔ رؤف جان و ای اولیکو دے آن سخت خُڑک مسن، او ہر کاریم ئے ذمہ واری ئٹ مونا دننگ نا جہد کریکہ۔ رؤف بھاز مہروانو بندغ ئس اس۔
خیر نن وتاخ نا پارہ غا ہنان گڑا رؤف جان سنگت آتون اوار پین کُنڈ ئسے آ گشت ئسے آ پیشتما و نن پین کُنڈ ئسے آ۔
ہندا وڑ راجی جہد ئنا کاریم تیٹ اِرا تو گدرینگا، نن وتاخ ئٹ اسُن، غٹ لشکر اوار اس۔ بھاز پِھر و چِھرک اسک، نن خاخر نا رہا تولوک اسون کہ توار ئس مس، سنگت آک کوٹی آن پیشتمار و خنان کہ رؤف جان سنگت آتون اوار بننگ اس۔ نن سنگت آتے بخیر کرین و مجلس بناء مس۔ دے اندن ایسر مس کہ اسُل سما ہم تمتو۔
شام ئنا ورغ جوڑ کرین و کنگن، گڑا رؤف یکہ تولوک اسک کنے توار کرے ”بر اندانگ اُستان درینُس کنے امر؟“ ولدا بشخندہ کرسا پارے ” نہ اڑے نے امر ستان دیوہ۔” خیر نن توسون و ہیت کرین، مجلس و دیوان کرین، جنگ ئنا کسہ غاتے کرین، ولے رؤف و اونا سنگت آک بھلو سفر ئس کریسُر و بھاز دمدرینگاسُر۔
سنگت وختس خاچنگ کن ہنا، نن ہم رخصت کرین ہنان۔ سہب ئنا سہار تون نن غٹ بش مسُن و چاہ کننگ آن پد ولدا دیوان و مجلس بناء کرین۔ ساہت ئسے آن گڈ سنگت آک دانگ اینگ مسُر، ہرکس تینا جاگہ غا تا پارہ غا پیشتما، اندا وڑ نن ہم پیشتمان تینا کاریم تیکن، رؤف جان آن نن رخصت کرین۔
منہ تو گدرینگا، ننے آ سنگت آک کلہو کریر کہ لشکر بھلو کاریم ئس ٹہفینے نُم ببو۔ خیر نن ہم پیشتمان، وختس نن وتاخ ئے سر مسُن گڑا رؤف جان و نن ہموڑے تینے خنان۔ بھاز خوش تب و مہروان ئس اس، ہر اسہ کاریم ئٹ چُست و چاڑ اسک۔ گشت ئس مروسس یا پین جنگی کاریم ٹہفنگ، او غُٹ آن مُہہ ئٹ اس۔ سنگت آک ترمل نا ٹریننگ کننگ اسُر، گڑا رؤف جان سخت خوڑتی ئٹ ہُننگ اس و استاد نا ہیت آتے بِننگ اس۔۔۔
برجاء ءِ۔۔۔
