تربت، گوادر، آواران، کوئٹہ، نوشکی و ایلو علاقہ غا تیان رسینگوکا حوال تا رد ئٹ اسہ ہفتہ ٹی کم آن کم 10 بندغ پاکستانی لشکر زوراکی ئٹ بیگواہ کرینے۔
تدوکا نن 3 بجہ نا وخت آ پاکستانی لشکر و ڈھکوک ادارہ غاک سیاسی باسک ماہ جبین نا اُرا غا چھاپہ خلکر و اونا چُنک سن مار ایمل اورنگزیب ئے زوراکی ئٹ ہرفِسہ تینتو دریر۔ ایمل ہشتمیکو جماعت نا خوانندہ ئس ءِ۔ پاکستانی لشکر اُرا ٹی ساڑی مہمان تا موبائل فون تِہ ہم درے۔
21 مئی آ ضلع کیچ ئنا علاقہ تربت ئٹ پاکستانی لشکر زمباد ڈرائیور مہیب اللہ ولد محمد علی ئے دزگیر کننگ آن گڈ بیگواہ کرے۔ مہیب اللہ نا تعلقداری سحر گیشکور آن پاننگک و اونا خاہوت اونا دمدستی آجوئی نا خواست کرینے۔
اندا دے گوادر نا علاقہ ڈور ئٹ پاکستانی لشکر اسہ اُرا ئسے آ چھاپہ خلِسہ شوکت نا مار حمل ئے زوراکی ئٹ ہرفِسہ تینتو درے۔ خاہوت نا پاننگ ءِ کہ دا وخت آ اُرا نا نہادی آ گِڑا تِہ ہم پاکستانی لشکر دُزی کرے درے۔
آواران نا علاقہ جھاؤ، کنگرائی آن خیر بخش نا مار سلطان ئے اِرا دے مُست بیگواہ کننگانے۔ خلیس نا درشانی مننگ ءِ کہ اودے پاکستانی لشکر دزگیر کننگ آن گڈ بیگواہ کرینے۔
ایلو کنڈ آن چاغی آن نوشکی آ سفر نا وخت آ عبدالغفور نا مار حسین احمد، عبدالغفور نا مار محمد رمضان و عبدالحق نا مار محمد داؤد زوراکی ئٹ بیگواہ کننگانو۔ اوفتا موبائل فونک بند ءُ، و خاہوت اوفتا سرسلامتی کن فریشان ءِ۔ خاہوت خُلیس نا درشانی کرینے کہ اوفتِہ پاکستانی لشکر زوراکی ئٹ بیگواہ کرینے۔
14 مئی آ پیر داد حکیم اور صادق واجداد ئے گڈاگی کیلکور آن کولواہ آ ہِننگ نا وخت آ کسر آن پاکستانی لشکر دزگیر کرے و زوراکی ئٹ بیگواہ کرے۔
ایلو کنڈ آن بلوچستان نا بنجائی شار شال و ضلع مستونگ آن زوراکی ئٹ بیگواہ کننگوک 15 بندغ آجو مسنو۔
آجو مروکا تیٹ خلیل احمد، عبداللہ کرد، شفیع محمد ساسولی، احمد خان بنگلزئی، ظہور احمد رند، حبیب الرحمن لانگو، رضوان شاہوانی، پالاچ شاہوانی، باسط شاہوانی، محمد عارف جتک، گل میر سمالانی، محمد زکریا کرد، عمیر احمد کرد و یاسر سارنگزئی اوار ءُ۔
داکان بیدس ڈسٹرکٹ بار ایسوسی ایشن مستونگ نا جنرل سیکریٹری چیف عطا اللہ بلوچ ایڈووکیٹ ہم اِستو آجو مسنے، ہرا نا زوراکی نا بیگواہی نا برخلاف وکیل کہول برانز ہم کریسس۔
