بلوچستان نا ضلع کیچ ئنا بنجاہی شار تربت ئٹی پاکستانی لشکر نا بھلو کاروان ئس رسینگانے۔ دا کاروان ئٹی کیہی بس و لشکری اُلاخ آک اَوار ءُ۔
پاکستانی لشکر نا کاروان نا بننگ آن پد شار ئنا جتا کسر تے ہِن و بر کِن بند کننگانے۔
ہندی حوال تا رد ئٹ پاکستانی لشکر نا کنڈ آن کسر آ ساڑی لس شاری تیا لٹ ئہ کٹ کننگانے، ہندن بھاز اُلاخ آتا شیشہ آتے ہم پرغنگانے۔ شاریک لشکری کارندہ آتا روشت ئے پھاش زوراکی پارینو۔
خیال ئٹ مرے کہ پاکستانی لشکر بھازیکا لشکری کارندہ آتا ہن و بر کن لس مسافر بس آتے کاریم ئٹ ہتیک۔ گدرینگوکا وخت آتیٹی اوفتے تربت، نوشکی و خضدار ئٹی جلہو تیتون مون تروئی تمانے۔ درو ہم خضدار ئٹی اسہ بس ئسے زیرو پؤانٹ نا ہند آ جلہو ئٹی ٹک کننگانے۔
پاکستانی لشکر نا ترجمان نا دعوی ءِ کہ جلہو ئٹی اسہ اسکول نا بس ئسے ٹک کننگانے۔ ولے آزات ذریعت آتیان دا بیان ئے کس پک کتنے۔
تراک ئٹی ٹک مروک بس و جانی نسخان آتا بارو ئٹ جتا جتاؤ حوال مونا بسُنے۔
