پنجگور، نوشکی و کراچی آن پاکستانی لشکر مُسہ بندغ دزگیر کننگ آن گڈ بیگواہ کرینے۔ اندن آواران آن بیگواہ کننگوک بندغ ئسے نا جون خننگانے۔
پنجگور آن بیگواہ کننگوک ورنا تیان اسٹ نا چاہنداری پنجگور تسپ ئنا جہی مقبول احمد نا مار مہراللہ نا پن ئٹ مسنے۔
خاہوت نا رد ئٹ مہر اللہ مزوری کریکہ و پاکستانی لشکر اودے 18 مئی 2025 آ اُرا غان ہرفِسہ بیگواہ کرینے۔ خاہوت اونا سرسلامت آجوئی نا خواست کرینے۔
نوشکی آن حوال ءِ کہ پاکستانی لشکر اسہ پین ورنا ئس بیگواہ کرینے ہرا نا چاہنداری فیفا اکبر دوست جمالدینی نا مار نوید جمالدینی نا پن ئٹ مسنے۔
حوال تروک آتا رد ئٹ پن کرورک ورنا ئے 19 مئی آ ویگہ نا 5:30 آ نوشکی کلی بدل کاریز کراس آن ہموتم بیگواہ کننگا ہراتم او تینا سنگت آتون اوار سفر کننگ اس۔
خن ئٹ خنوک شاہد آتا رد ئٹ سول وردی بینوک بندغ آک اودے اِرا چنکو گاڑی ٹی دو بُڑز کرفِسہ ہرفینو و نوشکی کینٹ آ رادہ کرینو۔
نوید نا سنگت آتے مُسہ ساہت آن پد یلہ کننگانے ولے نوید دائسکان بیگواہ ءِ۔ خاہوت اونا دمدستی آجوئی نا خواست کرینے۔
اندن کراچی نا علاقہ جام گوٹھ ملیر ئٹ درے نن پاکستانی لشکر بی وائی سی نا باسک، عبدالطیف نا مار میر بالاچ ئے دزگیر کننگ آن گڈ بیگواہ کرینے۔
اونا خاہوت اونا زوراکی نا بیگواہی ئے پک کرینے و اونا دمدستی آجوئی نا خواست کرینے۔
اندا وڑ بلوچستان نا ضلع آواران نا علاقہ کولواہ گشانگ آن استو لشکر کشی نا وخت آ پاکستانی لشکر اسہ ورنا ئس بیگواہ کرے ہرا نا اینو جون خننگانے۔
بیگواہ کننگوک ورنا، ساجد ناصر نا جون اینو سہب ئنا مالار چیل ئنا ہند آن خننگانے و اونا جون آ بیدادی تا نشان ہم ارے۔
جہی بندغ آتان رسینگوک حوال تا رد ئٹ ساجد ئے پاکستانی لشکر و ریاستی مخ تف ٹولی “ڈیتھ اسکواڈ” نا کارندہ غاک اُرا غان دزگیر کریسُر۔ ساجد ناصر مستری ناصر بلوچ نا مار اسک۔
