نوشت: نمر بلوچ
براہوئی مٹ: مبارک بلوچ
دیہاڑ ئٹی منہ ڈغار ہندنو مریرہ ہرا پاش وڑئٹ تو بے دیر و بے خرّسی خننگرِہ۔ ولے گواچن ئٹ او غیرت، آجوئی و مزاحمت نا گنج (خزانہ) آن پُر ءُ۔ بلوچستان اسہ ہندنو سر زمین ئس ءِ۔ مش تیٹی ڈھکوک، ریک آتیٹی پیڑوک و دریا نا اسہ بھلو خطہ ئس ہرا کہ سد سال آن سامراجی تاغت آتا نزر ئٹی ءِ۔ ولے ہر وخت آ، دیہاڑ نا عدالت ئٹی فیصلہ بلوچ راج ئنا حق ئٹی بسُنے۔
پُرتگیزیک بسُر، تو اوفتا جنگی جہاز، بارود و صلیبی آ غرور گْوادر و پسنی نا سرزمین ئٹی ٹکر لگِسہ مِش تیٹی اوار مسُر۔ بلوچ آک اوفتے دریا ئٹ ہندُن دکہ تِسُر کہ او پدا دا کُنڈ آ مون ئے کتور۔
عرب آک بسُر، اسلام تون تاغت نا نشہ ٹی۔ بلوچ آک دین ئے خن تیٹ قبول کریر۔ ولے عرب حکمران تن تڑی تِسُر خلیفہ عمر بن خطابؓ پارے کہ ” دا زمین نہ لشکر کننگ نا لائخ ءِ نہ دیر نہ خرسی و دھسنگ نا “اسہ خلافت ئس، ہراکہ دنیا ئے فتح کننگ اس بلوچ نا مونا بس تو نت تے تورے۔
پدا مغل بَس تینا جاہ و جلال و سلطنت نا غرور ئٹ ولے رند و لاشار، براہوئی، مری و ہزار آتا بے پنو بلوچ سپاہیک ہچ اوفتا مونا کاٹُم شیف کتوَس۔ مش تیٹی تولوک بلوچ آتا مونا مغل آتا زغم آک تمار۔
داسہ ہمو جلہو کروک ہرانا پن ئے بِننگ آن تہذیب آک لڑزرہ ۔ چنگیز خان فاتح بغداد، مسمارگِر خراسان و جلاد ماوراالنہر ءِ۔ ولے بلوچ سرزمین نا نیمہ غا بروک اونا ٹولی بلوچ آتا سنگر، مشی جنگی ہنر و ہندی مزاحمت نا مون ئٹی سلیتو۔ دیہاڑ ئٹی بلوچ و چنگیز نا لشکر نا مون پہ مون مننگ نا حوال کم ءِ۔ ولے ایرانی و نیامکو ایشیائی ذریعت دا ہیت ئے منک کہ چنگیز آن پد مکران و بلوچستان نا کسر بند مس۔ تاتاری بڑزی آن بیدس ہم بلوچ آتا نیام ئٹی بتوس۔ بلوچ نہ بیرہ زندہ مس بلکہ تینا سر زمین نا رکھ ئٹی سرسوب ہم مس۔
پدا انگریز بَس، او مکاری، معاہدہ و سلاہ ہیس۔ میر محراب خان نا شہادت آن پد ہم بلوچ آتا مزاحمت ایسر متو۔ قلات نا ریاست انگریز تون برابری ئٹ معاہدہ کرے۔ ہراکہ بلوچ آتا سیاسی سنچ و خودداری نا گواہی ءِ۔
و اینو ؟
اینو پدا ہمو دیہاڑ ئے نوشتہ کننگ مننگ ءِ۔ چینی سرمایہ کاری، گوادر پورٹ، سی پیک و جہانی تاغت آتا مونا اسہ وار پدا دا زمین بَس۔ شونداری نا نعرہ ٹی پیڑوک دا مداخلت بلوچ کن اسہ پوسکُنو نوآبادیاتی دروشم ئس اختیار کرینے۔ مڈی تے او دننگ ءِ ، روزگار ڈن آن بننگ ءِ ۔ و ہندی بلوچ بیرہ تماشائی مننگ ءِ۔
ولے بلوچ راج چُپ مرو ؟
نہ ، انتئے کہ بلوچ آتا ہنوکاتم (ماضی) دا وخت آن جتا اف۔ بلکہ دا ہمو نا آدینک ءِ۔ ہمو راج ہراکہ چنگیز خان نا مونا سلیس، پرتگالی تن مِڑا، عرب آتے سلیفے، مغل آتے تڑی تِس و انگریز تون برابری ٹی معاہدہ کرے، او اینو ہم تینا سر زمین کن سینہ ئے تورسہ سلوک ءِ۔
بلوچستان نا مشک بیرہ مش افس دا مزاحمت نا بُڑزیک ءُ۔ دا چُپی آسمان ئٹی قربانی تا توار ئے بُڑز کننگ ءِ۔ و دیہاڑ، بے شک گواہی ایتک کہ دا سرزمین آ ہر جلہو کروک بےسوب مسنے و بلوچ سرسوب مسنے۔
