ہندی حوالکار تا ردئٹ کینٹ آن پیشتموک کاروان ئٹی اوار بس آ جلہو مسنے، بھلو کچ ئسے ئٹ کہنگ آتا حوال رسینگانے۔
پاکستانی لشکر و ڈپٹی کمشنر نا دعویٰ ءِ کہ تراک اسکول نا چنا تا بس آ مسُنے واہم کیہی بے پک مروک حوالک سر مننگ ءُ ہرافتیٹی دعویٰ کننگک کہ فوجی ادارہ آک مخلوق ئے رد شاغنگ نا کوشست کننگ ءُ و ٹپی فوجی کارندہ غاتے چنک سن چنا ظاہر کننگ نا کوشست کننگ ءُ۔
حوال رسینگانے کہ تراک آن گڈ علاقہ ئٹ ہیلی کاپٹرک بال کننگ آ خننگ مسنو۔ تراک آن گڈ سیکیورٹی لشکر علاقہ ئے گھیرہ کرینے و سرچ آپریشن بناء کرینے۔
ٹپی تے دمدستی اسپتال آ سر کننگانے، واہم اسپتال ئٹ لس شاری و میڈیا نا بننگ آ پابندی خلنگانے۔
دا حوال تا دائسکان ہچو آزات و سوگو ذریعت ئسیٹ پٹ و پول مننگ کتنے۔
پن کروک تراک نا بابت ئٹ پاکستانی لشکر نا حوالکاری تلہ (آئی ایس پی آر) نا پاننگ ءِ کہ دا جلہو گمانی وڑ ئٹ اسہ سوگو دہشت گرد کاروائی ئس اسک۔ آئی ایس پی آر نا رد ئٹ دا جلہو ئٹ مُسہ چنا تون اوار پنچ بندغ بیران و کیہیک ٹپی مسنو۔
آئی ایس پی آر نا پاننگ ءِ کہ دا جلہو نا پد ئٹ ڈن ڈیہی تاغت آتا دو اوار ءِ، ہرافتا بابت ئٹ ادارہ نا دوبہ ءِ کہ او بھارتی ریاستی ادارہ آتا بھج تننگ آ بد ایمنی تالان کننگ نا کوشست کننگ ءُ۔
واہم دائسکان کس ئس دا جلہو نا زمہ واری ءِ ارفتنے۔
