بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹی پارینے کہ 17 مئی آ تنظیمی سنگت کیپٹن امجد بشام عرف شمس ساحر و لیفٹیننٹ صبراللہ بلوچ عرف واہگ جان سہب ئنا ہفت آ کیچ ئنا علاقہ تربت ئٹی پاکستانی لشکر نا ہیڈکوارٹر "اصغر گیٹ” آ گرنیڈ لانچر ئٹ جُلو کریر ہرا ٹِک آ لگار و اوڑے دشمن نا اسہ کارندہ ئس مرگ ئنا گواچی مس و ارٹ ٹھپی مسر۔ کاریم آن پد تومکا سنگتاک اوکان پیشتمار تو ریاستی لشکر بُڑزا سرویلینس ڈرون بال تِس و ڈرون سنگت آتا پدئٹ تما و دشمن فوج مون آن کسر ئے تفے ہراڑے اسہ جھڑپ ئسے نا بِنا مس۔ دہ منٹ چلّوکا دا جھڑپ ئٹی دشمن نا اِرا کارندہ خلّنگار و اسٹ ئس ٹھپی مس ہندن کیپٹن امجد بشام عرف شمس ساحر و لیفٹینینٹ صبراللہ عرف واہگ جان شہید مسّر۔
ترجمان نا پاننگ اس کہ شہید امجد بشام بلوچ کیپٹن و شہید صبراللہ بلوچ لیفٹیننٹ تیبر نا سنگت اسر، بلوچستان لبریشن فرنٹ تینا شہید سنگت آتے دروت ندر کیک و دا قول ئے کیک کہ شہید آتا مزل راجی آجوئی و آزات بلوچستان نا مسخت ئے سر مننگ اسکان ہِچ وڑئٹ پد سلوفن۔
او پارے کہ امجد بشام بلوچ گشاد تخوکو، سیاسی وڑئٹ سوگو و پُہہ ءُ ورنا ئس اس۔ اوٹی مُہی مننگ، بصیرت و راجی خزمت نا جوزہ اس، او خوانندہ اس اگہ او خواہِسکہ تو اسہ آسودہ ءُ زند ئس گدریفنگ کریکہ ولے او آسودہ آ زند ئے ہفتو و لمہ وطن نا آجوئی و قومی شرف ئکن جہد ئنا سخت انگا کسر ئے گچین کرے۔
ترجمان پارے کہ او خواننگ نا وخت آن سوگوو فکر ئس تخاکہ و راہشونی نا گشاد تخاکہ ہرانا سوَب آن او خوانندہ و السی سیاست ئٹ مخلوق ئٹی پِنی اس۔ 2017 آن او سنگر آ بس و دشمن نا برخلاف جنگ آتیٹ بشخ ہلک۔ 27 جنوری 2017 آ پاکستانی فوج اودے و اونا ایلم برکت بشام ئے زورئٹ بیگواہ کرے۔ ہژدہ تُو تورسہ امجد ئے سختو سزا تننگا و 29 جولائی 2018 ٹی اودے یلہ کننگا تو اونا بدن لٹ کُٹ آن پنّوک اس۔ ولے اُست تہ خُلیس آن آجو اس۔ منَہ دے آن پد او ولدا آجوئی نا جہد ئٹی اوار تمّا۔
اونا پاننگ اس کہ آجوئی آن گُڈ او ولدا شار ئٹی جنگ ئے برجا تخا۔ مئی 2022 آ اسہ کاریم ئسیٹ ریاستی فوج اودے پلویڑ کرے ولے امجد بلوچ جیرت، جنگی گشاد و بے خُلیسی ئٹ دشمن نا پلویڑ ئے پرغا و سرسوبی ئٹ پیشتما۔
اونا ودیک پاننگ اس کہ شہید امجد بشام تربت یونیورسٹی ٹی کمپیوٹر سائنس ئنا شعبہ ٹی بی ایس نا گُڈیکو سیمسٹر نا خوانندہ ئس اس و اسہ اکیڈمی ئسیٹ انگریزی زبان و کمپیوٹر خوانیفیکہ۔ او فکر، راجی خزمت، قربانی و دلیری نا اسہ سرجمو کتاب ئس اس۔
میجر گہرام بلوچ نا پاننگ کہ شہید صبراللہ بلوچ اسہ چُپو ولے جوزہ تخوکو سنگت ئس اس۔ ہرا چُھنک سنّی ٹی بلوچ راجی جہد ئٹی اوار تما۔ 2021 ئٹی او تنظیم ئٹی بس و زو ئس تنظیمی و السی کاریم تے مُہاڑ کننگ ئٹی لگا۔ اونا گشاد، سوبری و تنظیمی چائنداری اودے چھنکو وخت ئسیٹ ہمو بندغ آتیٹ اوار کرے ہرافتا بھروَسہ کننگاکَہ بلکہ عمل و رازداری نا زمہ واری تے ہم تننگاکَہ۔
2023 ئٹی او ریاستی فوج ئنا نظر ئٹی بس و خطرہ ٹی تما، ولے صبراللہ پدی مننگ یا چُپ کننگ نا جہہ آ جنگ ئنا کسر ئے گچین کرے۔ او السی کاریم تان پیشتمسہ سنگر آ کاریم کرے و مون ئنا چِر ئٹی زمہ واری پورو کرے۔ او بھاز ڈھکوئی آ و سخت آ کاریم تا بشخ مس و اسہ وخت ئس اسکان دشمن ئے ریفسہ بھازا علاقہ آتیٹ کاریم کرے۔
او ودیک پارے کہ صبراللہ بےدمدرینگوکو و جوزہ تخوکو سنگت ئس اس، بلکہ آجوئی نا مسخت تون خُڑکی و فکر ئنا راستی آ یخین تخسہ ہمت ئٹ گُڈیکو دم اسکان جہد کرسہ کرے۔
ایسر ئٹ بی ایل ایف نا ترجمان میجر گہرام بلوچ پارے کہ سنگت آتا شہیدی آن تنظیم دلیر و زمہ وارو سنگت گوئانے ولے اوفتا قربانی ننا جہد ئنا ہمو روشنا چراغ ءِ ہرا بروکا پیڑی تا راہشونی نا وسپہ جوڑ مرو۔
