نورا مینگل آن نورا پیرک اِسکان
نوشت: برزکوہی
| براہوئی مٹ: ہانی بلوچ
زرمبش براہوئی
بلوچ تاریخ مزاحمت ئٹ اَسہ فخر ئنا لائخ سبخ، جھالاوان نا مش تا خزم، انگریز سامراج کن بھیم ئنا چیدہ و خلقی کسہ تیٹ ” نورا نورا حمزہ نا مار ءِ” نا وڑ آ شعر، ہر دوئی آ لَس مروکا امر کڑد نوار ئے دیر تِپک۔ امو نورا مینگل ہرا اَسہ ہکل ئسے نا وڑ پلی ماس وڈھ آن بش مس و سرزمین بلوچستان نا آجوئی کن 9 سال اِسکان انگریز آتا برخلاف مزاحمت نا اندُنو تاریخ ئس لکھا، کہ اونا پِن اینو دلیری نا استعارہ جوڑ مسنُے۔
نور محمد پہلوانزئی مینگل عرف نورا اَسہ اندنو دور ئسیٹ توفک ئٹ بھلو مہارت تخاکہ، ہراتم توفک آک ناپید اسُر۔
و دا ہنر ئے ہم او دژمن آن ہیل کریسس، ہراتم او اول انگریز لشکر ئٹی بھرتی مس، تربیت دوئی کرے، وڈھ تھانہ نا وضعدار جوڑ کننگا، ولے 1910 ئٹی نورا مینگل تینا ہم خیال سنگت آتے مُچ کرِسہ اوفتے بھاز تاغت تخوکو دژمن ئسے نا برخلاف تحریک آجوئی نا بناء ئے کرے، و ولدا 1919 اِسکان جھالاوان و لسبیلہ نا مَش تیٹ رہینگِسہ اَسہ تاریخیئو مزاحمت ئسے نا بھلُنی ئے کرے۔ انگریز آک تینا تیبہ تاغت ئے کاریم ئٹ ہتنگ آن پد ہم نہ اودے خلنگ کیرہ نا ہلنگ کیرہ۔ ولے اَسہ وار ئس ولدا بلوچ آسستونک نا دُوشہ نا گواچی مریک۔ دا مُرغنا گوریلہ جنگ ئنا سوب آن نورا نا توفک خراب مریک او تینا خڑک ئنا سنگت حبیب اللہ خان نوشیروانی تون حوال کیک و اودے اَسہ پوسکنو توفک ئس تننگ نا وعدہ کیک۔ نورا خاران ئے سر مریک و حبیب اللہ نوابی نا بدلہ غا اونا کاٹم نا سودا خلیک و اودے 1919 ٹی دزگیر کرفِسہ بلوچی پِٹ آتے تینا لِخ ئنا ہار جوڑ کیک۔ نورا ئے عمر قیذ نا سزا تننگ مریک، ولے او اَسہ مَشی خزم ئس اسک قیذ ئٹ امر رہینگ کریکہ بیرہ اِرا سال آن پدا 30 اگست 1921 ئٹی حیدرآباد سندھ ئنا جیل ئٹ او شہید مریک۔
نورا قیذ ئٹ تبیہ غا زند بند مننگ نا پِن الوکا، اندا سوب آن او تینے جسم ئنا قیذ اِسکان آزاد کرے، و تہو ئٹ اوڑدہ مسک تانکہ او وار وار ودی مرسہ کے۔ وار وار تینا وطن آ ندر مرِسہ کے، ایتمسکان جتاء شکل و دروشم، رنگ و عمر دوئی کرسہ دا مزاحمت ئے برجاء تخِسہ کے، ایسکان کہ اونا وطن پیہون انگریز مریر یا مون آ انگریز یا گڑا حبیب اللہ نوشیروانی کون آ آستونک نا دُوشہ، دافتان تیبہ آجو متنے۔ نورا مینگل ننا خن تا مون آ اَسہ وار ئس ولدا ودی مس و ولدا او نورا پیرک نا شگل ئٹ اندا کسر تا کسری ئس مس ہراڑا او اَسہ کِرن ئس مُست ہناسس۔ ولے دا وار نا نورا چائیسس کہ مشی آ خزم آتا جہہ قفس اف اندا سوب آن دا وار زندہ دو بننگ نا جاگہ غا او گُڈی ساہ اِسکان جنگ کرے، او ولدا تینا وطن نا مِش و تہو ئٹ اوڑدہ مس اَسہ وار ئس ولدا ودی مننگ کن۔
نورا مینگل نا پِن و کڑد ئنا شرف ئے تینا سینہ ٹی بیریفوک، نورا پیرک اینو ننتو اوار اف۔ نورا نا گھنٹہ تے اسکان برجاء گڈی جنگ ایسر مس، ہرا جسم ئٹ نورا اسک، او یخ مرسہ تما، داسہ نورا نا ودار ایسر مس، داسہ نورا نا جنگی حکمت عملی و منصوبہ بندی تا بابت ئٹ جُواننگا و مدلل خیال آتے مونا ہتنگ نا سلسلہ توریس، اَسہ ساہ ئس تورے و خوشبو تالان مس۔ تہو داسہ وختس مند، وختس تمپ، وختس بلیدہ، وختس کوالواہ و گچک، وختس کلبر و ساہیجی، شیرازی و کوہ باتیل اِسکان نورا نا فکر نا ہنینا گند ئے تالان کرسہ دا ملاس آ زمین نا مہر ئٹ مٹائفگ ءِ۔
نورا اَسہ کامِلو بندغ ئس اسک بلکن بندغ آن ود او بِسنو فکر ئس اسک، دا اسہ مطلق راست ئسے کہ ہڑدے کروڑ آ بندغ آک کھئیرہ مُدامی کن فنا مریرہ، ولے اگہ گڑاس زندہ مریک و ابد نا کسر نا کسری جوڑ مریک گڑا او فکر مریک۔ نورا اَسہ فکر ئس اسک و فکر ئس ہی رہینگو۔
2010 آن 2016 اسکان بلوچ آجوئی دوست تنظیم آتیٹ چُنک چُنائی زد و ہٹ دھرمی، موقع پرستی و مفاد پرستی نا بنیاد آ بے ترتیبی و خرابی ودی کننگا و ہرا گند کروک و مون اِنگا عمل ئے پِنی آ احتساب، تنقیدی شعور و اصول پرستی نا پِن تننگا، اینو نہ سہی پھگہ تاریخ اندا وخت ئے مون انگا لوز آتیٹ یات تخوئے۔ اندا وخت ئٹ، بلوچ چاگڑد، بلوچ ورناک، بلوچ اُلس و بلوچ تنظیم آتیٹ ہرا وڑ ئنا مایوسی، بدظنی، بے اُمیتی و بھیم ودی مسنے شاید اونا مَٹ دو بفرو۔ بلوچ تنظیم آتا نیامٹ کچ ئے مچہ کننگ کن، غلط فہمی تے مُر کننگ کن نورا پیرک نا تگ و دو و کڑد آن نمن کننگ منکن اف، نورا اگہ مش ئنا کچ کڑد ادا کتنے گڑا اود فاصلہ نا دا تفوک سمندر ٹی بوچ ئنا وڑ تمِسہ اَسہ ارتعاش ئس ودی کرے، ہرا سکون تے پرغِسہ، جوش ئنا وڑ مونی ہننگ، تینا تہہ آن مایوسی، بے اُمیتی و بھیم ئنا گندہی تے پیشن خسا۔ اسہ طوفان ئس جوڑ مس دژمن آ قہر شاغنگ کن۔
دا نہ کتابیئو ہیت ءُ، و نہ ہی گواچن آن زیات درشانی ئسے، دا امو گواچن ءِ ہرا نہ لائبریری و الماری تا کتاب آتیٹ دو بریک، نہ سوشل میڈیا نا پوسٹ و لائک آتیٹ، بلکن دا گواچن نا خبر زمین، ننا چاگڑد، ننا ورنا تا شعور و احساس، جزیات و اوفتا نیت و عمل ئٹ رسینگک۔ اگہ نن تینے آن، تینا زمین آن، تینا زمینی گواچن تیان، تینا راج آن زرہ ئس وے خبر مرین، گڑا ننے دا چاننگ خواہک کہ نن تارمئی ٹی تیبہ نن سفر کرسہ کرون، ولے اَسہ گِڑدلیک ئسیٹ مرون، ہراتم خنک ملینگور، ہرانگا اسن ہمونگا سلوک خننگون، گڑا مایوسی و بھیم ننا تحریک تون تفوک بندغ تیتون اوار مروئے۔
دا راست ئسے کہ دا وخت بلوچ راج، بلوچ تحریک تینتون اوار گڑاس نا گڑاس موقع ہلِسہ بھاز سخت جہہ تیا سلوک ءِ۔ ہراکان فنا و بقاء نا سیم ئنا لیک بناء مرور، ننا بقاء ڈھکوک ءِ، ننا نسل آتا قربانی تیٹ و ننا فنا نا کسرک بے حسی، بیگانگی، چپی و راہ فراریت آن پیشتمور، گچین کننگ و تعین کننگ داسہ ننا دو تیٹ ءِ۔
داسہ نن مکاری، چالاخی، توار توار کننگ، زبان درازی و فرضی سیاسی اصطلاح تیٹ تینا چپی، راہ فراریت، بِدری و بے حسی ئے زیبا غا جَھل آتیٹ شاغِسہ مونا ہتنگ کین یا گڑا حق ئنا کسرآ ہنوکا و ندر مروکا مل آتا جنگ و قربانی تے تینا بےلائخی، لغوری، و راہ فراریت ئٹ زیان کین، ولے دا خرین آ راستی ئے کس ہم تاریخی گواچن تیان مسخ کننگ کپک کہ ہچ وخت کس راج نہ راج جوڑ مننگ کیک، نہ آزاتی نا کسر تیا گامزن مننگ کیک نہ ہی بقا و سلامتی نا نیمہ غا ہننگ کیک، و نہ تینا دژمن ئے شکست تننگ کیک ہراوختسکان محنت و مشقت، تکلیف و قربانی تے بسرچشم مَنیپ۔ ہراتم دا مستند فلسفہ ٹی “ہراتم” ” مگہ” “اگہ”یا “ولے” نا لوز پھاش مس گڑا نی چاس کہ نَرنگ و مایوسی نا زیباغا دروشم ئٹ کنے ٹی اَسہ زہریئو دوشہ ئس گند کشنگ ءِ۔
ای دا دلیل ئے منیو ہم کہ بیدس قربانی، بیدس محنت، بیدس کوشست، بیرہ و بیرہ گِنار ئٹ تولِسہ دادے تینا موقف و پالیسی وغیرہ پُہہ مرِسہ سرسوبی نا تُغ تیٹ گم و گار مننگ آن سرسوبی دوئی برو۔ کنے کس اَسہ دلیل و تحریکی تاریخ آن اَسہ ثبوت و حوالہ ئسے ایتِہ ارانگا، اراتم و امر بیرہ جواننگا نوشت، تران، نعرہ، بیرک، بحث و ہیت ئٹ راجی تحریک آتا شون و دیمروی ودی مسُنے و اسہ راج ئس خوشحال و آزاد زند گداریفینے۔
دا وخت جہاں ٹی سد آ نہ بلکن ہزار آ تا کچ ئٹ اندن جوانو چنکو چنکو پارٹی ارے، اوفتا زیباغا آئین و قانود ءِ، فلسفایہ موقف و پالیسی ارے، زبانی ہیت بھاز زیبا پالیسی بیانات و کلو ارے، ولے سوب صفر جمع صفر۔ ایلو تے الِسہ پاکستان ئٹ پن ئنا سوشلسٹ تے ہرین، ہرافتیٹ خوانوکا تا اسہ کھیپ ئس ساڑی ءِ، بھاز زیباؤ لٹریچر ارے، اوفتا گھنٹہ تے اسکان بحث چلیک، او ہم زبردست سیاسی و عملی اصطلاح تون اوار، نم اوفتے بنیرے گڑا سوچ کرورے کہ بس اِرا ہفتہ آن پدا تیبہ جہان ئٹ سوشلزم نا راج مرو، سرمایہ دارانہ نظام نا تابوت ئٹ گڈی میخ خلنگ مرو، ولے ہراتم نوشت و تران یا بحث آک ایسر مریر گڑا ہر گلی ٹی اندا پِن ئنا سوشلسٹ آک اُرا تیٹ ہم سوشلزم تینا جاگہ اونا چنکو ہم دروشم ئس اوفتٹ خننگپرو۔
مطلب دا تیبہ گڑاک و گواچن آک اینو نا افس و ہچ پوسکُن افس، ہراتم سوویت یونین نا انہدام مس، ننا راج، ننا ورنا تے جہد آن بیگانہ و مُر تخنگ کن ہموتم اندونو ماحول ئس جوڑ کننگا کہ جی جنگ اف، داسہ راج پرستی نا سیاست نہ، حالات آک بدل مسُنو، جہان بدل مسُنے۔ جذباتی طریقہ یا قربانی و دژمن ئے خلنگ آن ہچ مفرو، دا کل لغو وڑ ئنا دلیل آک ہموتم بناء مریرہ ہراتم جنگ آن دمدرینگ ودی مرے۔
نورا امو ورنا تیان اسک، ہرا تینا زمین آن کٹ متوس، ہرا تینا معروضی حالیت تیان تفوک اسُر، ہرافتے سخت زمینی گواچن تا سما اسک، ہرا راجی بِدری ئے تینا دامون ایمون الیتوکہ۔ ہرا دا راز ئے پُہہ مسس کہ سرسوبیمنا راز بیرہ عمل ءِ، اسہ وڑ عمل و محنت ئٹی ءِ۔ ہرا دا گواچن ئے پُہہ مسس کہ دا جنگ ئنا ایسری سرسوبی آ مروئے یا گڑا ننا ایسر مننگ آ، مُسٹمیکو کسر ہچ اف، ہچ دہنو کسر اف کہ نَرنگ مرے۔ او کھٹنگ کن جنگ کننگ اسک، نورا پھگ اکن جنگ کننگ اسک، نورا فنا نا دِتری پنجہ غا تیان اَسہ مستقبل ئس پُلنگ کن جنگ کننگ اسک و نورا جنگ کرِسہ کرو۔ نورا مُدامی آن جنگ کرسہ کیک، نورا ہر ہمو ورنا نا تہٹی ظاہر مرسہ جنگ کرو ہرا تینا زمین آن بیگانہ متنے۔ کَھٹنگ حبیب اللہ نوشیروانی نا مفرو نورا نا مرو، انتئے کہ نورا نا توفک ہچ وخت خراب متویسس بلکن او توفک ئے مونی تسس۔
