دانک: ارٹمیکو بشخ
نوشتکار : ڈاکٹر اللہ نذر بلوچ
براہوئی مٹ : شئے رحمت
بلوچ جنگ آجوئی اسہ وڑ برجاء ءِ ۔ جہان نا ہچو دہنو تاغت ئس افک کہ جنگ آجوئی ئے مات تسونے۔ انتئے کہ دا ہر وار اسہ پین رنگ و سوچ ئسے تون ودی مریک ہراکہ مہالو آن پین زیات سوگو و سبر مریک۔ داسہ نا جنگ آجوئی بلوچ کِن تینا مثال تینٹ ءِ۔ انتئے کہ بلوچ راجی آجوئی نا دا جنگ ٹولی تا جیڑہ غاتیان بڑز پاک ءُ اسہ جنگ آجوئی ئس ءِ ہراکہ بلوچ چاگڑد نا ہر طبقہ ئے زیمی و جنز ئے متحرک کرینے ہراکہ بلوچ راج ئنا رغ رغ ئٹ جاگہ کرینے۔ دا اسہ شعوریئو جنگ ئس ءِ۔
تحریک نا برخلاف دشمن نا بےرحم آ بیدادی و زوراکی بلوچ راج ئے پین زیات شعور تسنے۔ بلوچ راج ئنا بھلا نیمہ داسہ دا ہیت ئے پہُہ مسونے کہ دشمن ئے بیرہ ننا راجی مڈی تا ضرورت ءِ ننا نہ۔ ہرا نسل کہ دا جنگ ئنا وخت آ جوانی ئے سر مسونے ہمو کُل آن زیات متحرک ءِ۔ انتئے کہ او نوآبادیاتی تعلیمی ادارہ غاتیاں ہلیس ہڑدیئی زند ئٹی ترند آ رویہ ئے خنانے۔ گوریلا جنگ سیاسی نظریات آتیٹ مریک۔ داسہ محاز آ ساڑی گوریلا تینا زیات تر فیصلہ تیٹ بھلن تینٹ ءِ۔ او دشمن ئے ہبکہ کروکا کاروائی تا منصوبہ بندی و اوفتا عمل کننگ ئٹی بھلو کچ ئسے اسکان آجو و با وسائل ءِ۔
دا بھلا جنگ ئٹی بلوچ گوریلاک نہ بیرہ پوسکن آ ٹیکنالوجی ٹی برتری دوئی کرینو بلکہ ہر ہدف ئٹی دشمن ئے بے سوب و دشمن نا متکن ڈول آ بے دادی تے نیست و نابود کرینو۔
ارنسٹو چے گویرا پائک کہ دشمن آ ہر سرسوب آ دک گوریلا نا روح ئے پکنک نا وڑو شاتکامی ئس بشخک۔ دشمن پائک کہ جنگ بے رحم ءِ دا راست ئس ءِ کہ جنگ بے رحم ءِ۔ ای ہم تینا سنگت آتے پاوہ کہ دشمن آن رحم ئنا اومیت نادانی سے۔ جنگ آجوئی ٹی ہرا وخت کہ بھلو ترندی ئس بریک تو گوریلا و الس دا ہیت ئے سرسوبی سرپند مریرہ ولئے دہُن ئنگا حالت ئٹی صبر و حوصلہ ئٹ دشمن نا ردعمل نا انتظار کروئی ءِ۔
دا جنز (تحریک) آجوئی ہندنو جاگہ سے آ سر ءِ کہ پاکستان نا اختیار تخوک یعنی فوج آن ہلیس پارلیمنٹ اسکان دا ہیت ئے منّرہ کہ بلوچستان ئٹی آجوئی نا جنگ ءِ۔
دنیا نا ایلو راج آتا وڑ ننا نیام ئٹ ہم دشمن ئے آسراتی بشخوک جوڑ مسنو یا جوڑ کننگانو۔ دافک آجوئی اسکان دشمن ئے آسراتی ترِسہ کرور انتئے کہ اوفتے باور کرفنگ مریک کہ نُمے کمکار ارے و اوفک ہندا نشہ ٹی کور مرِسہ کیرہ۔
جنگ اخس کہ ہُرے اسکان مریک دشمن ہنداخس تینا زور ئے الس نا برخلاف کاریم ئٹ ہتِسہ کیک ہراکہ کوزہ گیر نا پیدواری ءِ۔ ولے بلوچ گوریلا تے دشمن نا کُل چم تیان واخب مروئی ءِ و دافتیان شعوری ردئٹ تیار مننگ ضروری ءِ ہندن نن فیصلہ مروک جنگ ئسے اسکان سر مرینہ۔
ایسر ئٹی ای تینا کُل سنگت آتے آن خواست کیوہ کہ توفک تینٹ جنگ کپک ہندا سوب آن ہرا بندغ دادے کاریم ئٹ ہتیک اودے شعور نا ایسری ہند اسکان سر مروئی ءِ انتئے کہ او تینتو اوار تینا نسل ئنا زندگی ئے رسک ئٹی تخنگ ئٹی ءِ، دا توفک تون نہ بیرہ اسٹ نا بلکہ تیوہ غا راج ئنا بقاء و روشنو وخت ئس تفوک ءِ۔
