بی ایل ایف نا ترجمان میجر گہرام بلوچ میڈیا ٹی شنگ مروک تینا درشان ئسیٹی پارینے کہ 15 مئی 2025 آ کولواہ نا ہند بدرنگ ئٹی سُہب ئنا 09 بجہ نا وخت بی ایل ایف نا سرمچارک پاکستانی لشکر نا کاروان ئٹی اوار بکتربند گاڑی ئے آئی ای ڈی بمب تراک ئٹی ٹک کریر و کاروان ٹی ساڑی ایلو اُلاخ و پیدل ہنوک آتیا مُست آن سنگر ہلوک سرمچارک جلہو کریر ہراٹی اسہ بکتر بند ئس تیبہ بھُس مس و اوٹی سوار کُل کارندہ غاک مرگ ئنا گواچی مسُر۔ کاروان نا ایلو اُلاخ و پیدل ہنوکا کارندہ تے ہم نسخان رسینگانے۔
او پارے کہ سرمچارک جنگ ئنا وخت دشمن لشکر آ جلہو نا ویڈیو ئے ریکارڈ کریر، ہرادے زوت بی ایل ایف نا میڈیا سیل آشوب آ شنگ کننگ مرو۔
ترجمان پارے کہ چھانڑدہ مئی 2025 آ شام ئنا ہفت بجہ غا سرمچارک جھاؤ، سیڑھ ئٹی کوزہ گیر پاکستانی لشکر نا چوکی ئے ٹک کریر۔ جلہو نا وخت سرمچارک چوکی آ آر پی جی نا کیہی گولہ خلکُر و بھلا سلاہ تیٹ ٹک کریر، ہرانا سوب آن دشمن لشکر ئے جانی نسخان ہرفوئی تمانے۔
ترجمان پارے کہ ایلو پارہ غان 15 مئی آ سہب ئنا پنچ بجہ غا سرمچارک تربت ئٹی جوسک نا جہہ آ پولیس نا چوکی ئے گھیرہ کریر و چوکی ٹی ساڑی کُل سرکاری سلاہ و ایلو مڈی تے تینا کوزہ ٹی کریر۔ پولیس کارندہ تے خبڑدار کننگ آن پد یلہ تننگا و تھانہ تون اوار ایلو سرکاری کاغد آتے بُن تننگا۔
میجر گہرام پارے کہ پانزدہ مئی 2025 آ دے آن نا سئے بجہ نا وخت بی ایل ایف نا سرمچارک وڈھ ئنا علاقہ وہیر ئٹی بلوچستان آن معدنیات دروکا اِرا گاڑی ئے نسخان تسُر و ڈرائیور تے سرپند کننگ آن پد یلہ تسُر۔
او پارے کہ بی ایل ایف کولواہ، جھاؤ، تربت و وڈھ ئٹی جلہو تا زمہ واری ئے ہرفک و میڈیا نا ذریعت ئٹ کُل گاڑی تا خواجہ غا تے سختی ئٹ خبڑدار کیک کہ اگہ اینو آن پد او بلوچستان ئٹی معدنیات دننگ ئٹی تُد مُسر گُڑا اوفتتون سختی کننگ مرو۔
ترجمان ایسر ئٹ پارے کہ بی ایل ایف نا سرمچارک بلوچستان نا آجوئی کن گام گام آ ملک الموت مرسا کوزہ گیر لشکر و ایلو سیکیورٹی ادارہ تیا جلہو کرور۔
