بلوچ نیشنل موومنٹ نا سیکریٹری جنرل و زرمبش براڈ کاسٹنگ کارپورییشن نا پوسکُن گچین مروک ڈائریکٹر دل مراد بلوچ پارینے کہ زرمبش ٹی وی زوت تینا نشریات آتا بناء ئے کرو، تیبہ تیاریک و ہیلکاری نا کاریمک پورو مسنو، ہفتہ نا دے ئکن زرمبش ٹی وی تینا بلوچی بولی نا نشریات آتا بناء ئے کننگ ئٹی ءِ۔
او پارے کہ زرمبش ریڈیو بھلو وخت ئسے آن بلوچ قوم ئنا توار، جد و جہد، ڈکھ و تغ تے دنیا اسکان سر کننگ نا سوب جوڑ مرِسا کرینے، داسہ اسہ پوسکنو باب ئسینا بناء ئے کننگ ئٹی ءِ۔
دل مراد بلوچ پارے کہ کنے دا پڑو ئے کننگ آ خوئشی مننگ ئٹی ءِ کہ زرمبش ریڈیو ئے زرمبش ٹی وی نا پن ئٹ داسہ اسٹوڈیو نا حیثیت تننگانے، تانکہ دا اسہ سوگو، ذمہ دار و کاریم کروکو میڈیا پلیٹ فارم ئسے نا دروشم ئٹ تینا کاریم تے گیشتر شابیت کے۔
داسہ زرمبش ٹی وی تینا ویل آتا مننگ آن پد ہم اولی مرحلہ ٹی بلوچ قوم ئنا توار ئے دنیا آ سر کننگ کن بلوچی بولی ہندُن مُستی براہوئی اردو و انگریزی بولی تیٹی تینا نشریات آتا بناء ئے کرو۔
او پارے کہ نن دا فیصلہ ئے سوگوی ئٹ کرینُن کہ بلوچ قوم اسٹ انگا ڈکھ، راجی مزاحمت و بندغی حق آتا لتاڑنگ ئے جہانی پڑ آ سر کین تانکہ دنیا بلوچ نا حقیقت آن سوہو مرے و اونا ضمیر بش مرے۔
زرمبش پُہہ مریک کہ دا مشن ہموتم سر سوب مرو کہ ہراتم ہر بلوچ، او خوانندہ ئس مرے یا کاریم کروک ئس، ازمکار مرے ادیب، ڈنی ڈیہہ تیٹی مرے یا تینا ڈیہہ ئٹی، تینا بشخ ئنا بتی ئے روشن کے۔ ہندا سوب آن زرمبش ہمو کھل بلوچ، دانشور، تنظیم، صحافی، تکنیکی چاہوک و دوستخواہ تے آن خواست کیک کہ دا سفر ئٹی ننتو کمک کیر۔
