بلوچستان لبریشن فرنٹ نا ترجمان میجر گہرام بلوچ میڈیا غا شنگ کروک بیان ئسیٹی پارینے کہ مشکے نا علاقہ کھندڑی ٹی اینو سُہب ئنا 8:30 آ روڈ جوڑ کروک آ کمپنی نا اسِہ ٹرک ئسے بی ایل ایف نا سرمچارک ہموتم آئی ای ڈی بم جلہو ئٹی ٹک کریر ہراتم پاکستانی لشکر نا کاروان ٹی کوزہ گیر لشکر نا کیمپ آن پیشتمسہ ہنِنگ ئٹی اسک، جلہو ٹی ٹرک ئے باز نُسخان مس و اوفتِہ جانی نسخان ہم مس۔
ترجمان پارے کہ دا روڈ جوڑ کروک آ کمپنی نا کارندہ غاک کوزہ گیر لشکر نا کیمپ ئٹی رہینگرہ اوفتا رکھ ئے پاکستانی لشکر نا کارندہ غاک کیرہ۔ اینو نا جلہو ٹی پاکستانی لشکر نا کاروان کارندہ غاتِہ سیکیورٹی تننگ اُسرہ، واہم سرمچارک روڈ جوڑ کروک شرکت نا خواجہ ئے سبخ تِننگ کہ جلہو ٹی ٹرک ئے ٹک کریر۔
ترجمان پارے کہ پین اسِہ جلہو ئسیٹی بی ایل ایف نا سرمچارک اینو سُہب ئنا 9 بجہ غا تمپ ئنا علاقہ گومازی ٹی کوزہ گیر لشکر نا چوکی نا کارندہ غاتیکن راشن دروک آ گاڑی ئے دوئی کرسا دریر۔
میجر گہرام بلوچ پارے کہ اینو کولواہ بدرنگ ئٹی سرمچارک ویگہ نا 4:30 آ پاکستانی لشکر نا کیمپ آ جلہو کریر، جلہو ٹی پاکستانی لشکر ئے جانی و مالی نُسخان مس۔
ترجمان میجر گہرام بلوچ بیان ئٹی پارے کہ 6 مئی 2025 آ ویگہ نا 4 بجہ نا وخت آ پروم نا علاقہ جائین ٹی بی ایل ایف نا سرمچارک پاکستانی لشکر نا کیمپ ئنا جوڑنگ کِن وسائل دروکا ٹرک گاڑی ئے تورسہ تفتیش آن پد فوجی مڈی و ٹرک ئے نُسخان تِسُر۔
بیان ئٹی ترجمان ودیک پارے کہ یات مرے داڑان مہالو میڈیا نا زریعت ئٹ ٹرانسپورٹر و روڈ جوڑو کا شرکت آتِہ تنبیہ کرینُن و اینو ہم تنبیہ کینہ کہ کوزہ گیر پاکستانی لشکر ئے آسراتی تروکا مُچ ڈٹ بندی تیٹی کاریم کپس، اگہ نا اوفتا گاڑی و مشین تِہ نُسخان تِننگ مرو۔
بیان نا ایسر ئٹ او پارے کہ بلوچستان لبریشن فرنٹ مشکے، کولواہ، پروم و گومازی ٹی پاکستانی لشکر نا کیمپ آ مڈی و راشن دروکا گاڑی تون اوار روڈ جوڑو کا شرکت نا گاڑی تِہ نُسخان تنننگ نا زمہ واری ئے ارفِک، مُچ گاڑی خواجہ غاتِہ تنبیہ کیک کہ اوفک دشمن لشکر نا سہولت کار مننگ ئے یلہ کیر اگہ نا تینا جانی و مالی نُسخان نا زمہ وار تینٹ مرور۔
