بلوچستان نا ضلع آواران نا علاقہ مشکے ٹی پاکستانی لشکر نا کاروان ئٹی اوار اسہ الاخ ئسے آ ترند و بمب جلہو ئسیٹی الاخ تیبہ بھس مسنے۔
حوال تا رد ئٹ اینو سہب ئنا مشکے نا علاقہ کندڑی ٹی ہموتم تراک مسک ہراتم پاکستانی لشکر نا کاروان اوکان گدرینگ ئٹی اسک۔ تراک ئٹی اسہ الاخ ئس تیبہ بھس مسک ہرانا بھرم ئٹی لشکر نا کیہی کارندہ تا کہنگ و ٹپی مننگ نا حوال رسینگانے۔
ولے داسکان کوالخواہ تا کنڈ آن دا جلہو نا بارو ئٹ ہچو درشان مونا بتنے۔
گدرینگوکا وخت آتیٹی دن انگا جلہو تا ذمہ واری تے بلوچ سلاہ بند تنظیم آک ہرفینو، ولے دا جلہو نا ذمہ واری ئے دائسکان ہچو تنظیم ئس ہرفتنے۔
