بلوچستان نا ضلع قلات و سبی آن شش بندغ, اندن گوادر و کراچی آن مُسہ بندغ پاکستانی لشکر زوراکی ئٹ بیگواہ کرینے۔
حوال تا رد ئٹ قلات نا علاقہ گراپ ئٹ پاکستانی لشکر پنچ بندغ لشکر کشی نا وخت آ دزگیر کننگ آن گڈ بیگواہ کرینے۔
پن کروک بندغ آتیان مُسٹ نا چائندئی جمالدین، عطاء اللہ و لطیف نا پن ئٹ مسنے و ایلو اِرٹ نا دائسکان چائندئی مننگ کتنے۔
ایلو کنڈ آن سبی آن پاکستانی لشکر عبدلستار نا مار صادق خان ئے زوراکی ئٹ بیگواہ کرینے۔
جہی حوال تا رد ئٹ پن کروک بندغ ئے پاکستانی لشکر چھار دے مُست اونا دکان آن زوراکی ئٹ بیگواہ کرینے و دائسکان اونا ہچ ڈس اف۔
اندن بلوچستان نا دریابی شار گوادر آن پاکستانی لشکر رفیق نا مار شعيب و موسٰی نا مار حفيظ ئے ٹی ٹی سی کالونی آن دزگیر کننگ آن گڈ بیگواہ کرینے۔
اندا وڑ درو کراچی ایئرپورٹ آ پاکستانی لشکر اسہ ورنا ئس دزگیر کننگ آن گڈ بیگواہ کرینے ہرا نا چائندئی در محمد نا مار عبدالواحد نا پن ئٹ مسنے۔ پن کروک بندغ بلوچستان نا ضلع آواران نا علاقہ پیراندار نا جہی ئس ءِ۔
حوال تا رد ئٹ عبدالواحد ئے امیگریشن کلیئرنس آن گُڈ دزگیر کننگاسس ہراکان گڈ اونا ہچ ڈس اف۔ خاہوت اونا بیگواہی نا حوال ئے پک کرینے و کوالخواہ تیان اونا آجوئی نا خواست کرینے۔
بلوچستان ئٹ زوراکی نا بیگواہیک ہڑدیئی بنداو آ رپورٹ مننگ ءُ و بیگواہ غا بندغ آتا جشوک جون تتون اوار زیمی آ بندغ آتِہ ٹِک کرسا خلنگ (ٹارگٹ کلنگ) و دروغ ئنا مونتس تیٹ کھسفنگ نا تدینی تیٹ ہم اسہ وار پدا ودکی مسنے۔
