بلوچ نیشنل موومنٹ (بی این ایم) نا کنڈ آن نیدر لینڈ نا جتا شار تیٹی بلوچستان ئٹی برجاء بندغی حق آتا سخت انگا لتاڑ، بیگواہی و ریاستی زوراکی نا برخلاف برانز و عکس آتا مون پاشی اڈ تننگا۔ دا کمپئن نا بنداوی مسخت جہانی کہول نا پام ئے بلوچستان ئٹی برجاء بیدادی و بندغی بحران نا کنڈ آ کننگ اسک۔
برانز ئٹی بندی بندغی حق آتا باسک، صحافی و ایلو چاگڑدی آ بندغ آک بشخ ہلکُر۔ اوار مروکاک دو تیٹی بینر و پلے کارڈ ہرفیسُر، ہرافتا زوراکی ئٹ بیگواہی، بیدس عدالت خون و کوزہ گیر پاکستانی لشکر نا زوراکی نا برخلاف نعرہ نوشتہ کروک اسک۔
دا مہم نا رد ئٹ 3 مئی آ اتریخت سینٹرال، 10 مئی آ آزنہم و 11 مئی آ ماستریخت ئٹی پمفلٹ بشخنگا۔
مون پاشی ٹی ہتنگوکا عکس آک بلوچستان نا جتا جاگہ آتیٹی مروک بندغی حق آتا لتاڑ، زوراکی ئٹ بیگواہ کننگوک آتا خاہوت و زمینی راستی تا درشانی ئے کریرہ۔ دا عکس آتا مسخت بلوچ قوم نا دیہاڑ، مڈی تا لٹ و پل و بلوچستان نا جغرافیائی اہمیت ئے مونا ہتنگ اسک۔
برانز مچی ٹی بلوچ نیشنل موومنٹ نیدرلینڈز چیپٹر نا بھلا مہیم عبدالرحیم، واحد بلوچ، ڈاکٹر لطیف بلوچ، باسط ظہیر و براھگ بلوچ تران کریر۔ تران کروک آتا پاننگ اسک کہ دا برانز اسہ علامتی برانز ئس ءِ، ہرانا ذریعت ئٹ نن جہانی ضمیر ئے چھنڈو تننگ خواہنہ۔ گدرینگوکا اسہ تو ئٹی پاکستانی لشکر چھل آن زیات بندغ ئے دروغ نا مونتس آتیٹی کھسفینے، ہندن سد آتا کچ ئے زوراکی ئٹ بیگواہ کننگانے۔
او پاریر کہ ایلو نیمہ غا بلوچ یکجہتی کمیٹی نا مہبر ڈاکٹر ماہ رنگ بلوچ، بیبو بلوچ، گلزادی بلوچ، شاہ جی بلوچ و بیبگر بلوچ آ ہدہ جیل ئٹی بھاز لٹ ئہ کٹ مننگ ئٹی ءِ۔ نن اقوام متحدہ و جہانی بندغی حق آتا ادارہ آتے آن خواست کینہ کہ بلوچستان ئٹی مروک بیدادی تا نوٹس ئے ہلیر۔
مچی نا ایسر ئٹ برانزیک جہانی کہول آن خواست کریر کہ بلوچستان ئٹی بندغی حق آتے تننگ، زوراکی نا بیگواہی تا ایسری و زیمی مروک خاہوت آتے انصاف تننگ کن زوت آن زوت گام ہرفر۔
