بی ایل ایف نا ترجمان میجر گہرام بلوچ میڈیا ٹی شنگ کروک تینا درشان ئسے ٹی پارے کہ سرمچارک شام ئنا 07 بجہ آن 11 بجہ نا نیام ئٹ بارکھان ئٹی رڑشم نا جہہ آ پنجاب آ ہنوکا کسر ئے تفیر۔ دا وخت آ گاڑی تیٹی ساڑی کیہی پنجابی تا چائندئی کننگا ولے اوفتیٹی کس ئس فوج یا انٹیلیجنس نا کارندہ ئس الو اندا سوب آن اوفتے یلہ کننگا۔
ترجمان پارے کہ ننا دشمنی لس پنجابی تیتون اف بلکہ ہمو پنجابی تتون ءِ ہرا پاکستانی لشکر، انٹیلیجنس ایجنسی و پالیسی ساز ادارہ تیتون ریاستی پاور اسٹرکچر ئٹی تینا اکثریت نا سوب آن بلوچستان ئٹی زوراکی ئٹ کوزہ، بلوچ زنک کش پالیسی اڈ تننگ و وسائل تا لٹ و پُل نا زمہ وار و بے بندغی عمل نا بشخ ءُ۔
او مُستی پارے کہ دوانزدہ مئی 2025 آ ویگہ نا شش بجہ نا وخت آ کچھی نا ہند کناڈو ٹی بی ایل ایف نا سرمچارک لیویز چیک پوسٹ ئےبگھیرہ کریر و چیک پوسٹ ئٹی ساڑی کُل سرکاری سلاہ تے ہرفیر و لیویز کارندہ تے یلہ کریر۔
اونا پاننگ اس کہ دوازدہ مئی 2025 آ اسہ پین کاروائی ئسے ٹی بی ایل ایف نا سرمچارک آواران، کولواہ ٹی گشانگ نا جہہ آ دو بجہ نا وخت کوزہ گیر پاکستانی لشکر نا بھلنی ٹی کاریم کروک ڈیتھ اسکواڈ نا سلاہ بند کارندہ تیا اسہ بھلو جلہو ئس کریر۔
او ودیک پارے کہ سرمچارک و ڈیتھ اسکواڈ با کارندہ تا نیامٹ ہُرے اسکان جھڑپ مس، و ہموتم کوزہ گیر پاکستانی لشکر نا اسہ قافلہ ئس ڈیتھ اسکواڈ کارندہ تا کمک کن سر مس۔ سرمچار تا دا جلہو ٹی ڈیتھ اسکواڈ نا پنچ کارندہ مرگ ئنا گواچی مسُر۔ ہرافتیٹ پروار مشکے نا جہی قاسم نا مار نادر ہم اوار ء۔ سرسوب کاروائی آن پد سرمچارک رکھ ئٹ تینا کیمپ آ سر مسُر۔
میجر گہرام بلوچ پارے کہ بی ایل ایف اینو اَسہ وار ئس ولدا میڈیا نا زریعت ئٹ آواران نا اُلس ئے خبر تیک کہ او ڈیتھ اسکواڈ نا بھلا اورنگزیب بزنجو آن مُر مریر و تینا ورنا تے ہم اوڑان مُر تخیر۔ انتئے کہ کل کوزہ گیر لشکر نا دلال اوفتے چنکا نوکری تا لالچ ترِسہ بلوچ زنک کشی نا بشخ جوڑ کیک۔
12 مئی 2025 بلوچستان نا علاقہ گریشہ گونی ٹی ویگہ نا وخت آ بی ایل ایف نا سرمچارک گشت آ اسُر ہموتم لیویز کارندہ تون مون پہ مون مسُر، سرمچارک لیویز کارندہ تے دزگیر کرسہ اوفتا سرکاری سلاہ تے کوزہ کریر و اوفتے یلہ کریر۔
جارکش ایسر ئٹ پارے کہ بلوچستان لبریشن فرنٹ لیویز کارندہ تا سرکاری سلاہ تے پُھلنگ، ڈیتھ اسکواڈ آ جلہو و بارکھان آن پنجاب کن ہنوکا کسر نا ناکہ بندی نا زمہ واری ئے ہرفک۔
اسہ پین بیان ئس شنگ کرسا میجر گہرام پارے کہ دوانزدہ مئی 2025 آ ویگہ نا چھار بجہ نا وخت آ بی ایل ایف نا سرمچارک کولواہ، شاہو باتل نا ہند آ کوزہ گیر پاکستانی لشکر نا چوکی آ اِرا کنڈ آن جلہو کریر، ہرا نا سوب آن کوزہ گیر لشکر ئے جانی و مالی نسخان مس۔
او پارے کہ سینزدہ مئی 2025 آ سہب ئنا 7 بجہ نا وخت آ جھاؤ نا علاقہ گزی سوادان ئٹ اسہ جوڑستی کمپنی ئسے نا رکھ آ سلوک سیکیورٹی کارندہ تِہ ہموتم اینٹی پرسنل بارودی سرنگ نا گواچی کننگا ہراتم او تینا اڈ تروک جاگہ غا تا ہِننگ اسُر، ہراڑے بی ایل ایف نا سرمچارک مُست آن بارودی کھڈ ئس خلکسُر۔ اندن کہ او جاگہ غا تیا سُر مسُر تو بارود سرنگ ترند تراک ئٹ ترخا ہرا نا سوب آن اِرا کارندہ مرگ ئنا گواچی مسُر و اِرٹ ٹپی مسُر۔
ترجمان پارے کہ بلوچستان لبریشن فرنٹ کولواہ و جھاؤ ٹی دشمن لشکر آ جلہو تا ذمہ واری ئے ہرفک و بلوچستان نا آجوئی، جند خواجہی و کوزہ گیر لشکر نا پیشتمنگ اسکان جنگ برجاء تخنگ نا سوغند ہرفک۔
