بلوچستان نا جتاء علاقہ تیان مُسہ بندغ نا جونک خننگانو، پولیس و لیویز کالخواہ تا رد ئٹ تُدینیک پنجگور، واشک نا علاقہ ناگ و کچھی نا علاقہ ڈھاڈر ٹی مسُنو۔
ضلع پنجگور نا علاقہ پیرے جہلگ آن اسہ بندغ ئسے نا جون خننگانے ہرادے سُم خلسِہ کھسفنگانے۔ جون ئے چاہنداری کن ٹیچنگ اسپتال آ دننگانے۔ خلنگوکا نا چاہنداری دائسکان مننگ کتنے۔
لیویز حوالکار تا رد ئٹ ناگ ئنا علاقہ بانسر ٹی سلاہ بند بندغ آک نن نیمہ غا اسہ بندغ ئسے اونا ارا غان برمتہ کرینو و مَچہ مُر بانسر نا چھڑائی نا جہہ آ اودے خلِسہ جون ئے تہ خسّانو۔
خلنگوکا نا چاہنداری ناگ ئنا جہی جان محمد نا مار داود نا پن ئٹ مسُنے۔ جون ئے آر ایچ سی اسپتال آ دننگانے۔ واہم خون ئنا سوب سما تمتنے۔
دانگ ضلع کچھی نا علاقہ چاندرامی ڈھاڈر آن اسہ نادرستو بندغ ئسے نا جشوک جون خننگا۔ پولیس نا رَد ئٹ پن کروک بندغ ئے گُٹو کرِسہ خلنگ مسُنے۔
جون ئے سول اسپتال ڈھاڈر آ دننگانے۔ ایم ایس سول اسپتال ڈاکٹر زاہد نا رَد ئٹ خلنگوکا نا بدن آ بیدادی نا نشانک ساڑی اریر۔
