بلوچستان نا ضلع پنجگور ئٹی درے نن پاکستانی لشکر سمکاری کرسہ زامران نا جہی الٰہی بخش نا مار لعل جان ئے کھسفے۔
حوالکار تا رد ئٹ تدینی ہموتم مس ہراتم پاکستانی لشکر اُلسی گاڑی ئسے آ سمکاری کرے ہرانا سوب آن لعل جان پِنیئو ورنائس بیران مس۔
خاہوت نا رد ئٹ پاکستانی لشکر ہنوکا گاڑی آ سُمکاری کرے ہراڑان لعل جان بیران مس۔ اودے اینو تربت ئٹ گُڈی ہند کننگانے۔
ایلو کنڈ آن قلات نا علاقہ مغلزئی آن خڑک بنجائی کسر آ نادرست آ موٹر سئیکل سوار سلاہ بند بندغ آتا سُمکاری آن اسہ ورنا ئس کھسکُنے۔
پولیس حوالکار تا رد ئٹ تدینی کوئٹہ ـ کراچی دگ آ مسُنے، ہراڑے سُمکاری نا سوب آن 24 سالی کوئنگ قلات نا جہی محمد عارف نا مار محمد رمضان بیران مسُنے۔
خلنگوکا بندغ نا جون ئے ڈی ایچ کیو اسپتال قلات آ دننگا ہراڑے المی کاروائی آن پد جون ئے خاہوت نا حوالہ کننگا۔ واہم دائسکان سُمکاری نا سوب سما تمتنے۔
