بلوچ نیشنل موومنٹ نا کنڈ آن واشنگٹن ڈی سی ٹی اسہ چائندئی مہم ئس اڈ تننگا ہراٹی اسہ چِرینگوکو اشتہاری ٹرک ئس کاریم ئٹ ہتنگا۔ دا اشتہاری ٹرک ئنا ذریعت ئٹ بلوچ یکجہتی کمیٹی (BYC) نا سروک آتا بےقانودی دزگیری و دزگیری ٹی اوفتیا بیدادی تے پھاش کننگا۔
دا مہم ئٹ بلوچستان ئٹی برجاء زوراکی نا بیگواہی تا ویل آ ہم روشنائی شاغنگا و مخلوق ئے دا ویل آ پام ترفنگ نا کوشست کننگا۔ مہم نا اسہ بشخ ئسیٹ اشتہاری ٹرک ئے پاکستانی سفارت خانہ نا خُڑک ئٹ دننگ مس۔
بی این ایم دا رد ئٹ تینا شنگ کروک بیان ئٹ پارے کہ بلوچ نیشنل موومنٹ دا بےقانودی دزگیری و دزگیر ئٹ بی وائی سی نا راہشون تیا بیدادی ئے شیف خلیک۔ بی این ایم ہر تلہ (پلیٹ فارم) غا دا وڑ ئنا کارروائی تا برخلاف توار بُڑز کرو۔ بلوچستان نا آجوئی آن بیدس دا وڑ ئنا زوراکی تے توننگ منکن اف۔ جہانی کہول ئے بلوچ قوم ئنا آجوئی نا جہد ئٹ بلوچ قوم تون اوار سلوئی ارے۔
اندن بلوچ نیشنل موومنٹ نا کنڈ آن پڑو کننگانے کہ بلوچستان ئٹ برجاء ریاستی زوراکی و بندغی حق آتا لتاڑ ئے پھاش کننگ کن نیدرلینڈز نا شار آنہم و ماسٹرکٹ ئٹ 10 و 11 مئی 2025 آ چائندئی مہم اڈ تننگو۔ آنہم ئٹ دا وختا بی این ایم نا چائندئی مہم برجاء ءِ۔
