بلوچستان ئٹی جمعہ نا دے جتا علاقہ آتیٹ سلاہ بند جلہو تیٹ پاکستانی لشکر آ جلہو، پولیس و لیویز چیک پوسٹ آتیا کوزہ، سرکاری دفتر و بے ہندی بندغ آتے سلاہ بند جلہو تیٹ ٹک کننگ نا حوال رسینگانے۔
پنجگور نا علاقہ بونستان ئٹ سلاہ بند بندغ آک پولیس نا اسہ چیک پوسٹ ئسے آ کوزہ کریر۔ جہی حوال تا رد ئٹ کسر تے تفنگ نا وختا ڈیتھ اسکواڈ آن تعلقداری تخوک قاسم گروہ نا کارندہ ئس ٹپی مسنے۔
ایلو کنڈ آن پنجگور وشبود ئٹ سلاہ بند بندغ آک کسر تے تفِسہ پولیس نا اِرا گاڑی کوزہ کریر و کارندہ تے دزگیر کریر، سلاہ تے دوئی مسر و تھانہ ئے ہُشار ۔
اوتھل بازار ئٹ جلہو ئٹ اسہ سلاہ بند جلہو ئسے ٹی پنجاب آن تعلقداری تخوک مُسہ بندغ کھسفنگار۔
ضلع کیچ ئنا تحصیل ہوشاب ئٹ سلاہ بند بندغ آک شار آ جلہو کرسا لیویز تھانہ و نادرا نا دفتر آ کوزہ کریر و بُن تسُر۔ شار ئنا بنجائی کسر تے تفِسہ کیہی بندغ آتے دزگیر کریر۔ اندا علاقہ ٹی پاکستانی لشکر نا بنجائی کیمپ آ ہم جلہو کننگا، ہراڑے سمکاری و تراک آتا توار بِننگ مس۔
بولان نا علاقہ بھاگ و ڈھاڈر ئٹ پولیس تھانہ غاتے چغلی بمب جلہو ئٹ ٹک کننگا۔ دا جلہو تا بھرم ئٹ ماڑی تے نسخان مس واہم جانی نسخان نا حوال رسینگتنے۔
خاران نا ہندو محلہ ٹی نادرست آ بندغ آتا سمکاری آن خدا نظر پنیئو بندغ ئس بیران، و بلیدہ ٹی ہم سخت سمکاری و تراک آتا توار بِننگ مس۔
اندا وختا ناصر آباد آن حوال رسینگا کہ یوسی چیئرمین منظور احمد و مختار گچکی ئے نادرست آ بندغ آک ہوت آباد آن بیگواہ کرینو۔ تدینی نا پٹ ئہ پول برجاء ءِ۔
