بلوچ یکجہتی کمیٹی نا بنجاہی ترجمان پارینے کہ کمشنر و ڈی سی کوئٹہ زہیر بلوچ ئے زندان آن اسپتال آ دننگ کن الیپسہ۔
او پارے کہ گدرینگوکا ارا تو آن بلوچ یکجہتی کمیٹی مہبر، باسک و دوستخواہ تا برخلاف کریک ڈاون برجاء ءِ، ہراٹی بلوچ یکجہتی کمیٹی نا مہبر آتون اوار سد آتا کچ بندغ آتے وے قانودی دزگیر کننگانے۔
اوفتا پاننگ اسک کہ ظہیر بلوچ ہرا نا سن 75 سال ءِ، چنکا عید ئنا دے شال ئٹی زوراکی ئٹ بیگواہ کننگوک بندغ آتا خاہوت آتا پر امن برانز ئٹی اوار مننگ و اواری نا درشانی کننگ نا سوب آن دزگیر کننگا۔ اوڑا تھری ایم پی او نا وڑ انگا متنازع و وے عدالتی قانود نا رد ئٹ معدمہ جوڑ کرسہ اودے زندان ئٹی بند کننگانے۔ ولے اونا سن، تب و کڑد ہچ وڑ ئسے ئٹ دزگیر کننگ نا قابل افک۔
او گیشتر پارے کہ ظییر بلوچ نا تب دے پہ دے آن خراب مننگ ئٹی ءِ۔ اودے ارا وار اسپتال آ دننگ اسکان ہیت بسُنے۔ و استو زندان ئٹی تمنگ نا سوب آن اونا حالیت خرابو کچ ئسے اسکان نازرک مسُنے۔ جیل ئنا رکھوک آتا کنڈ آن خواست کننگ آن پد ہم کمشنر شال و ڈی سی شال اودے مون تننگ آن نمن کرینو، ہرانا سوب ظہیر بلوچ داسکان زندان ئٹی وے علاج آن ساڑی ءِ۔
بی وائی سی نا ترجمان پارے کہ دا حالیت نہ بیرہ وے بندغی بلکن ریاست پاکستان نا بلوچ تون پاش دشمنی نا گواہی ئے ایتک۔ اگہ ظہیر بلوچ ئے گڑاس مسک تو دادے ہچو وڑ ئسے ئٹ قدرتی مرگ یا تدینی سمجھنگ مروف۔ دا اسہ پھاشو غفلت و حکومت نا بے سوبی نا بھرم مرو۔ ہرانا نا تیبہ ذمہ وار کمشنر شال ڈی سی شال و پن ئنا صوبائی حکومت و ایلو ادارہ آک مرور۔
او پارے کہ نن بندغی حق آتا کھل ہندی و جیانی ادارہ، میڈیا، سول سوسائٹی و قانود نا بیرک ئے ہرفوکا تے آن خواست کینہ کہ او دا بیدادی نا برخلاف توار ہرفر، و آئین قانود و بندغی شرافت نا مخ تفی ئے کیر۔
